Tags-Wafa

ye apnī apnī aadat hai ye apnī apnī fitrat hai
koī hai banda-e-mehr-o-vafā to be-vafā koī

munkir rah-e-vafā meñ 'fanā' kis tarah se ho
merā jahāñ meñ koī vajūd-o-adam nahīñ

bechain kahāñ dil-e-sāmāñ yāqūb kā hai maqāl
jins-e-vafā kā hai kaal kan.ān meñ haT-tāl hai

tirī qurbateñ tirī chāhatīñ sabhī nafratoñ meñ badal ga.iiñ
maiñ to ibtidā se thī bevafā vo tirī vafāoñ kā kyā huā

vo faqat ik shor thā ham par pas-e-maqtal khulā
halqa-e-yārāñ meñ jo rasm-e-vafā kā shor thā

taqdīr-e-vafā kā phuuT jaanā
maiñ bhūlā na dil kā TuuT jaanā

chalo us bevafā ko maiñ bhulā kar dekh letā huuñ
ye sho.ale ḳhushk pattoñ meñ chhupā kar dekh letā huuñ

hairāñ huuñ ki ye kaun sā dastūr-e-vafā hai
tū misl-e-rag-e-jāñ hai to kyuuñ mujh se judā hai

likkhā hai mirā naam samundar pe havā ne
aur dono kī fitrat meñ sukūñ hai na vafā hai

ham sar-e-chāk-e-vafā haiñ aur tirā dast-e-hunar
jo banā degā hameñ ai yaar ban jā.eñge ham

kuchh na thā juz ḳhvāb-e-vahshat vo vafā is ahd kī
raaz itnī der kā is umr meñ aa kar khulā

mustujib-e-zulm-o-sitam-o-jaur-o-jafā huuñ
har-chand ki jaltā huuñ pe sargarm-e-vafā huuñ

har dushman-e-jāñ ahl-e-vafā hai
ik bā-vafā tum ik bā-vafā dil

rāh-e-vafā meñ luuTā gayā dil
hai hai mirā dil bekas mirā dil

ishq meñ bāñdh ke paimān-e-vafā
mujh ko jiine kī duā de koī

maiñ ne pūchhā to hai anjām-e-vafā
ab ye Dar hai na batā de koī

tabassum-e-lab-e-jānāñ se khelne vaale
ġham-e-vafā ko ġham-e-zindagī samajhte haiñ

junūñ kī rasm zamāne meñ aam ho na sakī
havas thī chaah vafā kī ġhulām ho na sakī

be-jhijhak chal na sakā dasht-e-vafā meñ ab tak
rukte dekhā kabhī us shoḳh ko chalte dekhā

pahroñ pas-e-dīvār khaḌā thā so khaḌā hai
dīvāna hai pāband-e-rah-e-rasm-o-vafā hai