Tags-Wafa

ab takalluf bartaraf ye aap ko ma.alūm hai
kyuuñ mirā ḳhvāb-e-vafā ta.abīr se mahrūm hai

maar Daalā vafā-shi.āroñ ne
be-vafāoñ kī baat karte ho

rañg-e-vafā uḌā dil-e-saḳht-e-raqīb se
botal meñ ye sharāb na Thahrī ubal ga.ī

hargiz nahīñ jiine se dil-e-zār ḳhafā
siine meñ machaltī hai tamannā-e-vafā

vo kahte haiñ ye saarī bevafā.ī hai mohabbat kī
na 'muztar' be-vafā maiñ huuñ na 'muztar' be-vafā tum ho

kahīñ is phūTe-muñh se bevafā kā lafz niklā thā
bas ab ta.anoñ pe ta.ane haiñ ki be-shak bā-vafā tum ho

'inshā'-jī use rok ke pūchheñ tum ko to muft milā hai husn
kis liye phir bāzār-e-vafā meñ tum ne ye jins girāñ kī hai

har shaam sitam laatī hai ik sub.h-e-ġharībāñ
ai rañg-e-vafā chādar-e-sad-chāk pe rahnā

ham ne taur-e-vafā nahīñ badlā
tere zulm-o-sitam bhī kam na hue

ghar kā rasta bhī milā thā shāyad
raah meñ sañg-e-vafā thā shāyad

mujhe bhī apne ehsās-e-vafā ko āzmānā hai
ba-zo.am-e-ishq afkār-e-pareshāñ le ke chaltā huuñ

bevafā huuñ vafā na kar paayā
kuchh hī din sharmsār rahne de

ham aap ko to ishq meñ barbād kareñge
tāsīr-e-vafā par tujhe kyā yaad kareñge

tire qasr-e-vafā kī chhat tale zinda to haiñ ham-dam
magar is sā.ebān-e-shauq-e-lā-hāsil kā kyā kahnā

aa.e haiñ 'mīr' muñh ko banā.e ḳhafā se aaj
shāyad bigaḌ ga.ī hai kuchh us bevafā se aaj

kyā maslahat-shanās thā vo aadmī 'qatīl'
majbūriyoñ kā jis ne vafā naam rakh diyā

rah-e-vafā meñ dil o jaañ nisār kar jaa.eñ
agar ye apnā muqaddar nahīñ to kuchh bhī nahīñ

vo sitam na Dhaa.e to kyā kare use kyā ḳhabar ki vafā hai kyaa?
tū usī ko pyaar kare hai kyuuñ ye 'kalīm' tujh ko huā hai kyaa?

tuur par rāh-e-vafā meñ bo diye kāñTe kalīm
ishq kī vus.at ko masdūd-e-taqāzā kar diyā

merī ayyār nigāhoñ se vafā māñgtā hai
vo bhī mohtāj milā vo bhī savālī niklā