Tags-Wafa

vafā-pesha āshiq nahīñ dekhā tum ne mujhe dekh lo jāñch lo aazmā lo
tumhāre ishāre pe qurbān kar duuñ abhī māya-e-zindagānī kaho to

suntā huuñ ki aap ke vafādār
anjām-e-vafā se Dar rahe haiñ

yahī hai jī meñ ki vo rafta-e-taġhāful o naaz
kahīñ mile to vahī qissa-e-vafā kahiye

mirī ḳhushbū se mo.attar thā gulistān-e-vafā
ḳhaar mānind mirā yaar gulāboñ meñ rahā

muqaddar se mire donoñ ke donoñ bevafā nikle
na umr-e-bevafā palTī na phir jā kar shabāb aayā

maiñ ne kahā vafā kī kabhī dāstāñ sunī
bolā haiñ qisse sunñe sunāne ke aur bhī

vo bevafā hai jo kahtā hai mujh se ai 'rāhī'
har ek va.ade pe ḳhud inhirāf maiñ ne kiyā

vafā ke baab meñ ilzām-e-āshiqī na liyā
ki terī baat kī aur terā naam bhī na liyā

vo kabhī mā.il-e-vafā na huā
merā chāhā huā burā na huā

tū apnī zaat meñ ik manzil-e-vafā hai magar
maiñ vo charāġh ki raushan hai rāstā mujh se

merī vafā kā vo mo'tarif hai
apnī ḳhatā ko maane na maane

bazm-e-vafā sajī to ajab silsile hue
shikve hue na un se na ham se gile hue

josh-e-vafā kā naam junūñ rakh diyā gayā
ai dard aaj zabt-e-fuġhāñ se sivā na ho

mujhe bhī de rahe the ḳhil.at-e-vafā lekin
nazar bachā ke maiñ darbār se nikal aayā

ḳhamīr merā uThā vafā se
vajūd merā faqat hayā se

juuñ farishta ajal kā aatā hai
aise vāda-vafā kare koī

zamāne-bhar meñ koī bhī vafā-sipās nahīñ
ḳhudā-shanās bahut haiñ adā-shanās nahīñ

dil kāmyāb hai na nazar bāryāb hai
paalā paḌā hai ishq meñ kis bevafā ke saath

evaz namāz-e-janāza ke mere lāshe par
tamām qissa-e-mehr-o-vafā bayān hue

ghar meñ dīpak hī jalā hai na koī sham-e-vafā
muddatoñ dil hī jalā hai tire jaane ke baad