Tags-Wafa

jafā pe shukr kā ummīd-vār kyuuñ aayā
mirī vafā kā use e'tibār kyuuñ aayā

kise zindagī hai aziiz ab kise ārzū-e-shab-e-tarab
magar ai nigār-e-vafā talab tirā e'tibār koī to ho

muravvatoñ pe vafā kā gumāñ bhī rakhtā thā
vo aadmī thā ġhalat-fahmiyāñ bhī rakhtā thā

terā paimān-e-vafā raah kī dīvār banā
varna sochā thā ki jab chāhūñgā mar jā.ūñgā

kahā maiñ ne khileñge kab vafā ke phuul
javāb aayā abhī mausam ḳhizānī hai

kyā ye subūt kam nahīñ merī vafāoñ kā
maiñ aap kah rahā huuñ bahut bevafā huuñ maiñ

maiñ bhī kyā kartā ki is ko bevafā honā hī thā
zindagī ko ek din mujh se judā honā hī thā

kārgar kaun rahā kār-e-vafā meñ 'ḳhālid'
kis kī qismat meñ hai farhād kā tesha honā

jab kabhī un kī jafāoñ kī shikāyat kī hai
tajziya apnī vafā kā bhī kiyā hai maiñ ne

ik pahelī ko musalsal sochtā huuñ to mujhe
bā-vafā achchhā lagā ki bevafā achchhā lagā

iltifāt-e-yār thā ik ḳhvāb-e-āġhāz-e-vafā
sach huā kartī haiñ in ḳhvāboñ kī ta.abīreñ kahīñ

abhī toḌo na ye tilism-e-vafā
maiñ abhī pyaar ke ḳhumār meñ huuñ

be-vafā hī sahī zamāne meñ
ham kisī fan kī intihā to hue

saarī mahfil meñ ik tum se us ko taġhāful kyuuñ hai 'zakā'
koī ḳhaas andāz-e-vafā ho ye bhī to ho saktā hai

ye kis maqām pe pahuñchā hai kārvān-e-vafā
hai ek zahar sā phailā huā fazāoñ meñ

kyā din the jab ma.āl-e-vafā kī ḳhabar na thī
vo din bhī the ki hāl-e-vafā dāstāñ na thā

ḳhū-e-vafā milī dil-e-dard-āshnā milā
kyā rah gayā hai aur jo nā māñgeñ ḳhudā se ham

ye vafā bhī jafā ke baab meñ hai
jaan merī bhī ik azaab meñ hai

jo shahīd-e-rāh-e-vafā hue vo isī ḳhushī meñ magan rahe
ki jo din the un kī hayāt ke ġham-e-zindagī meñ guzar ga.e

tirī vafāoñ ke mausam badalte rahte haiñ
mirī vafā kā chaman bas tujhe nihārtā hai