Tags-Wafa

rah-e-vafā meñ mujhe kaash aisī maut mile
ki bād-e-marg mujhe merī zindagī tarse

hai ab bhī silsila-e-dostī jahāñ meñ magar
vafā-shanās mohabbat ko dostī tarse

jab talak duniyā meñ kāġhaz aur qalam maujūd haiñ
bā-vafā likhtī rahūñgī bevafā ke sāmne

kis qadar zālim hai ye duniyā ta.ajjub hai mujhe
bevafā kahtī hai mujh ko bevafā ke sāmne

hamārā kaam hai ghuT ghuT ke marnā
vahī jaane jafā kyā hai vafā kyā

rāh-e-vafā meñ qatra-e-shabnam bhī hai bahut
jis se bujhegī pyaas vo dariyā na aa.egā

itnī tahzīb-e-rah-o-rasm to baaqī thī ki vo
laakh ranjish sahī va.ada to vafā karte the

saarī ḳhushiyāñ vafā nahīñ kartīñ
dard se dil ko āshnā rakhnā

haiñ yādgār-e-ālam-e-fānī ye donoñ chiiz
us kī jafā aur apnī vafā likh rakheñge ham

muravvat se ho begāna vafā se duur ho kosoñ
ye sach hai nāznīñ ho ḳhūb-sūrat ho magar kyā ho

kuchh is tarah se luTī hai matā-e-dīda-o-dil
ki ab kisī se bhī zikr-e-vafā nahīñ karte

sarsabz ye jañgal chāhat kā vo dasht-e-vafā hai vīrāñ bhī
hai dil ko sukūñ bhī dekh ke ye aur zehn-e-rasā hai hairāñ bhī

mile to tū hī mile aur kuchh qubūl nahīñ
jahāñ meñ hausle ahl-e-vafā ke dekh zarā

dekhiye is tarah paimān-e-vafā puurā huā
sham.a jab raushan huī marne ko parvāne ga.e

ye Thiik hai ki tirā pyaar sīm-posh na thā
vafā-shanās thā lekin vafā-farosh na thā

maiñ sochtī huuñ ki ik jism ke pujārī ko
mirī vafā ne vafā kā suhāg kyuuñ samjhā

bil-āḳhir aaj merā zabt-e-ulfat rañg le aayā
mujhe hī jāñnisār-e-ishq-o-jāñbāz-e-vafā samjhe

na hogā koī ham sā rahrav-e-rāh-e-vafā 'jauhar'
ham is manzil kī har aafat ko sāmān-e-baqā samjhe

koī barsā na sar-e-kisht-e-vafā
kitne bādal guhar-afshāñ guzre

rasm-e-vafā na pyaar kī pahlī sī riit hai
jaane kahāñ vo priit ke dhāre chale ga.e