Tags-Wafa

maiñ kaañp uThā thā ḳhud ko vafādār dekh kar
mauj-e-vafā ke paas hī mauj-e-fanā milī

ye gul-kada kahiye jise firdaus kā ḳhāka
hai dafn yahīñ ḳhaak meñ sarmāya vafā kā

jab qābil-e-dīd dil-rubā ho
allāh kare ki bā-vafā ho

bachā ke laa.e ham ai yaar phir bhī naqd-e-vafā
agarche luTte rahe rahzanoñ ke haath chale

shauq ek nafas thā aur vafā ko
pā-e-mah-o-sāl chāhiye thā

kyā us ko maiñ vafā ke taqāze batā.ūñ ab
jab vo vafā kā ahd nibhā hī nahīñ rahā

jahāñ zikr-e-mehr-o-vafā mile vahīñ 'indirā' kā qalam chale
ye kitāb-e-ishq meñ ho raqam ki fareb meñ bhī yaqīn ho

yuuñ vafā ke saare nibhāo ġham ki fareb meñ bhī yaqīn ho
koī baat aisī kaho sanam ki fareb meñ bhī yaqīn ho

va.ada vo kar rahe haiñ zarā lutf dekhiye
va.ada ye kah rahā hai na karnā vafā mujhe

vo rahtā bevafā lekin nazar ke sāmne rahtā
nazar se duur hai to fāsle sone nahīñ dete

mirī vafā kī haqīqat ġhubār-e-dasht-e-talab
mirī vafā ke fasāne tirī galī meñ rahe

zabt-e-alam ke imtihāñ dār-o-rasan ke marhale
kaun sī mushkileñ nahīñ ahl-e-vafā kī raah meñ

ik shaḳhs bā-zamīr mirā yaar 'mus.hafī'
merī tarah vafā kā parastār 'mus.hafī'

jidhar bhī jaao koī raah rok letā hai
vafā ne chhoḌī nahīñ ek bhī Dagar tanhā

kisī ġhazal kā koī sher gungunāte chaleñ
tavīl rāheñ vafā kī haiñ aur safar tanhā

be-vafā ḳhudā se Dar ta.ana-e-vafā na de
'tājvar' meñ aur aib kuchh hoñ be-vafā nahīñ

husn-e-shoḳh-chashm meñ naam ko vafā nahīñ
dard-āfrīñ nazar dard-āshnā nahīñ

na-jāne kaise aziyyat sameTtā hī rahā
vafā-shanās jo dil kī asaas rahtā hai

maiñ ban ke us kī tamannā uḌā phirūñ tanhā
vo ban ke merī vafā kā libās rahtā hai

sunte haiñ bazm-e-yār meñ chehre utar ga.e
kis ne vafā kī dāstāñ dohrā.ī der tak