Tags-Wafa

ahl-e-vafā ne mujh ko jaanā ahl-e-jafā ne bhī pahchānā
ye hai izzat ye hai shohrat kis kī badaulat dil kī badaulat

kis tarah dil se bhulā baiThe hamārī yaad ko
is tarah pardes jā kar bevafā kyuuñ ho ga.e

in vafādārī ke vādoñ ko ilāhī kyā huā
vo vafā.eñ karne vaale bevafā kyuuñ ho ga.e

āshnā ho kar taġhāful āshnā kyuuñ ho ga.e
bā-vafā the tum to āḳhir bevafā kyuuñ ho ga.e

dāman-e-mauj-e-sabā ḳhālī huā
bū-e-gul dasht-e-vafā meñ kho ga.ī

bhūle se koī naam vafā kā nahīñ letā
duniyā ko abhī yaad hai anjām hamārā

vo ḳhūb-sūrat laḌkiyāñ
dasht-e-vafā kī hirniyāñ

jo log abhī tak naam vafā kā lete haiñ
vo jaan ke dhoke khāte, dhoke dete haiñ

taras rahā huuñ tumhārī zabāñ se sunñe ko
ki tum kabhī mirā harf-e-vafā hue hote

vahī kuufī vahī lashkar vahī paimān-e-vafā
vahī āsār moharram ke mahīne vaale

ġhurūr-e-ishq ḳhudī aur ābrū-e-vafā
inheñ gañvā ke bahut kuchh bachā liyā maiñ ne

ham tire shahr se yuuñ jān-e-vafā lauT aa.e
jaise dīvār se Takrā ke sadā lauT aa.e

vafā kī raah meñ aise kamāl kartī huuñ
na koī shikva na koī savāl kartī huuñ

andalīboñ ko milī āh-o-bukā kī tālīm
aur parvānoñ ko dī soz-e-vafā kī tālīm

vafā kī raah meñ kis par na tohmateñ aa.iiñ
koī to aisī zamāne meñ ik misāl mile

use samajhne kā koī to rāsta nikle
maiñ chāhtā bhī yahī thā vo bevafā nikle

'asad' farefta-e-intiḳhāb-e-tarz-e-jafā
vagarna dilbarī-e-vāda-e-vafā ma.alūm

ye vafā kī saḳht rāheñ ye tumhāre pā-e-nāzuk
na lo intiqām mujh se mire saath saath chal ke

kis se mansūb hai har jafā har vafā
ye sitam ye karam kis ke hone se hai