Tags-Wafa

ma.ānī hī to nahīñ kyā badal ga.e us ke
vafā ko naam jo dete ho tum aziyyat kā

is ahd meñ ilāhī mohabbat ko kyā huā
chhoḌā vafā ko un ne muravvat ko kyā huā

rah-e-vafā meñ jo baḌh chuke haiñ vo paañv pīchhe na haT sakeñge
tum apne hadd-e-sitam se guzro hameñ jo karnā hai kar rahe haiñ

hurūf-e-makr tire lab pe the magar zālim
mujhe fareb bhī khānā vafā kī raah meñ thā

muḳhātab kar ke apne dil ko kahnā ho to kuchh kahiye
'sabā' us bevafā ke āsare par shā.irī kab tak

terī ik ik adā ne luuT liyā
be-vafā.ī hai kyā vafā kyā hai

pahle duniyā meñ vafā koī sifat hotī thī
sharm aatī hai ab arbāb-e-vafā hone meñ

jinheñ harf-e-jāñ kī ḳhabar nahīñ vo paḌhāne aa.e kitāb-e-jāñ
jinheñ koī ilm-e-vafā na thā vo sikhāne aa.e vafā mujhe

ye maanā zarra-e-āvāra-e-dasht-e-vafā huuñ maiñ
nibhānā hī paḌegā tujh ko duniyā-e-hasīñ mujh se

tirī vafā kā huā thā kabhī gumāñ mujh ko
vahī ḳhayāl huā aish-e-jāvedāñ mujh ko

vafā bhī de dī anā bhī de dī
'sabā' se phir kyuuñ ḳhafā hai koī

zindāñ zindāñ shor-e-junūñ hai mausam-e-gul ke aane se
mahfil mahfil ab ke baras arbāb-e-vafā kī baat chalī

ek huā dīvāna ik ne sar teshe se phoḌ liyā
kaise kaise log the jin se rasm-e-vafā kī baat chalī

maanā ki shahr-e-husn meñ jins-e-vafā nahīñ
lekin jahāñ meñ ishq kī daulat ko kyā huā

ab rāh-e-vafā ke patthar ko ham phuul nahīñ samjheñge kabhī
pahle hī qadam par Thes lagī dil TuuT gayā achchhā hī huā

husn kab ishq kā mamnūn-e-vafā hotā hai
laakh parvāna mare sham.a pe kyā hotā hai

bahāna chāhiye us ko bhī ab tark-e-vafā kā
maiñ ḳhud us se karūñ koī shikāyat chāhtā hai

be-amāñ huuñ in dinoñ maiñ dar-ba-dar phirtā huuñ maiñ
maiñ mavaddat huuñ vafā huuñ ḳhair kā jazba huuñ maiñ

vafā ke naam par pairā kiye kachche ghaḌe le kar
Duboyā zindagī ko dāstāñ-dar-dāstāñ ham ne

aao ahd-e-vafā kareñ donoñ
aur ahd-e-vafā vafā na kareñ