Tags-Wafa

harf-e-vafā kī koī vaq.at duniyā kī nazroñ meñ nahīñ
harf-e-vafā hī jhuuT kahā ho aisā bhī ho saktā hai

kahāñ nasheman dil kā banā.eñ uljhan bhī hai aur Dar bhī
ḳhud hī shikasta shāḳh-e-vafā ho aisā bhī ho saktā hai

ishq ko pās-e-vafā aaj bhī karte dekhā
ek patthar ke liye jī se guzarte dekhā

vafā ke naam pe rakkhī haiñ tohmateñ kyā kyā
bigāḌ dī haiñ zamāne ne sūrateñ kyā kyā

ummīd-e-vafā ke pesh-e-nazar maiñ un kī jafā.eñ bhuul gayā
hai mustaqbil par aañkh mirī maazī ko bhulātā jaatā huuñ

vafā kī shakl na dekhī tumhāre va.adoñ par
yahī zamāne meñ hai e.atibār kī sūrat

sar-rishta-e-vafā se kyā sham.a-rū haiñ vāqif
ham ne patañg un se milnā uḌā diyā hai

khulā fareb-e-mohabbat dikhā.ī detā hai
ajab kamāl hai us bevafā ke lahje meñ

kitne chālāk haiñ ḳhūbāñ 'alvī'
ham ko ilzām-e-vafā dete haiñ

vafā meñ jaan luTāne ke ba.ad bhī 'lubnā'
mire ḳhulūs-e-mohabbat pe vaar kis ne kiyā

hama nā-umīdī hama bad-gumānī
maiñ dil huuñ fareb-e-vafā-ḳhurdagāñ kā

tārīkiyoñ meñ apnī ziyā chhoḌ jā.ūñgā
guzrūñgā maiñ to naqsh-e-vafā chhoḌ jā.ūñgā

ruke haiñ yuuñ ki salāsil paḌe haiñ paañv meñ
zamīn band-e-vafā se rihā.ī de to chaleñ

har saañs hai sharh-e-nākāmī phir ishq ko rusvā kaun kare
takmīl-e-vafā hai miT jaanā jiine kī tamannā kaun kare

guzarne vaale musāfir se kī umīd-e-vafā
har ek rah se koī intizār le ke uThā

rah-e-vafā meñ bhaTaktī rahtī jo tere sapnoñ meñ gum na rahtī
tire ḳhayāloñ meñ jī rahī huuñ tire tasavvur meñ Dhal rahī huuñ

jaane kyā soch ke ham tujh se vafā karte haiñ
qarz hai pichhle janm kā so adā karte haiñ

tirī vafā mirī nas nas meñ zahr bhar degī
ye dostī bhī tirī dushmanī na ban jaa.e

siina raushan ho to hai soz-e-suḳhan ain-e-hayāt
ho na raushan to suḳhan marg-e-davām ai saaqī

tum vaz-e-mohabbat kyā jaano tum ko vo junūñ kyuuñ hāsil ho
mushkil hai bahut hī shart-e-vafā nāhaq na paḌo is mushkil meñ