Tags-Wafa

TuuTā hai apne zom-e-vafā kā tilism aaj
mahsūs ho rahā hai ki tū bevafā na thā

ham ḳhud bhī tark-e-rāh-e-vafā par haiñ munfa.il
par kyā kareñ ki aur koī rāsta na thā

rasm hī shahr-e-tamannā se vafā kī uTh jaa.e
is tarah to na koī ahl-e-mohabbat ko satā.e

faḳhr-e-ḳhātūn-e-hind hai 'ismat'
ham se pūchhe koī vafā kyā hai

dushman-e-mehr-o-vafā se koī kartā hai nibāh
kaun chāhegā tujhe tere 'musavvir' kī tarah

zindagī bhar sirf use puujā magar ghar baiTh kar
pāsdārān-e-vafā kā kaam darbānī nahīñ

ahd-e-vafā kā qarz adā kar diyā gayā
mahrūmiyoñ kā dard atā kar diyā gayā

ab to kar Dāliye vafā us ko
vo jo va.ada udhār rahtā hai

marūñ maiñ is meñ yā rah jā.ūñ jiitā
yahī sheva mirā mehr-o-vafā hai

maiñ saarī umr ahd-e-vafā meñ lagā rahā
anjām kah rahā hai ḳhatā meñ lagā rahā

chaman ke ishq meñ ahl-e-vafā ye bhuul ga.e
badal ga.ī jo chaman kī fazā to kyā hogā

ḳhushā ki apnī vafā fāsloñ kī nazr huī
hamāre ba.ad zamīñ par rifāqateñ hoñgī

log kyā saada haiñ ummīd-e-vafā rakhte haiñ
jaise ma.alūm nahīñ un ko haqīqat terī

malka-e-husn nahīñ phir bhī tū ai jān-e-vafā
achchhī lagtī hai bahut hī mujhe sūrat terī

kyā hai jo uTh gayā hai par basta-e-vafā hai
qaid-e-hayāt meñ hai tū 'mīr' aa rahegā

merī mahbūb ye hañgāma-e-tajdīd-e-vafā
merī afsurda javānī ke liye raas nahīñ

haiñ jo muravvaj mehr-o-vafā ke sab sar-rishte bhuul ga.e
phir ga.e tum to qaul-o-qasam se apne navishte bhuul ga.e

koī hogā nahīñ is jins-e-vafā kā tālib
kaun hai mere sivā jis ko ye dikhlāoge

vafā kā kāġhaz to bhiig jā.egā bad-gumānī kī bārishoñ meñ
ḳhatoñ kī bāteñ to ḳhvāb hoñgī payām mumkin nahīñ rahegā

tujh ko chāhat hai vafā kī to mujhe ġhaur se paḌh
vo kitāboñ meñ kahāñ hai jo likhā hai mujh meñ