Tags-Wafa

vafā kā naam hī duniyā se uTh chukā 'kaifī'
kahāñ zamāne meñ ab koī qadr-dāñ apnā

na de fareb-e-vafā le na imtihāñ apnā
hai be-niyāz-e-karam yār-e-bad-gumāñ apnā

kal us but-e-bā-vafā se mil kar jo aur betāb ho gayā dil
huā ye zāhir ki ranj-o-ġham kī jahāñ meñ koī davā nahīñ hai

kisī meñ tāb-e-alam nahīñ hai kisī meñ soz-e-vafā nahīñ hai
sunā.eñ kis ko hikāyat-e-ġham ki koī dard-āshnā nahīñ hai

dekhte ahl-e-jahāñ zauq-e-vafā ke jauhar
us kī talvār hī pahuñchī na hamāre sar tak

vafā-dārī ba-shart-e-ustuvārī asl īmāñ hai
mare but-ḳhāne meñ to kaabe meñ gaaḌo birhman ko

ma.ashūq to bevafā haiñ par umr
un se bhī ziyāda bevafā hai

tire ba.ad is jahāñ meñ koī dūsrā nahīñ thā
are be-misāl tujh sā koī bevafā nahīñ thā

haqqā ki vo jāda-e-vafā se bhī phirā
ahbāb-o-azīz-o-aqrabā se bhī phirā

shahr-e-vafā se dasht-e-junūñ tak chāhe jitne marāhil huuñ
vahshat ke to dūsre ruḳh par ek darīcha kaafī hai

maiñ tahī-dast huuñ bāzār-e-vafā meñ 'kausar'
sikka sikka zar-e-ummīd kā khoTā niklā

mehnat-e-ahl-e-vafā aa hī ga.ī kaam āḳhir
har shigāf-e-ġham-e-hastī se saverā niklā

añdherī shab meñ charāġh-e-rah-e-vafā denā
ta.alluqāt ko nazdīk se sadā denā

ab us kī baaī hai ab iḳhtiyār us kā hai
kahīñ kā maiñ na rahā us ko bevafā likh kar

bahut kaḌā hai mohabbat ke rāstoñ kā safar
jafā kī dhuup chhupī hai vafā kī chhāñv meñ

iz.hār-e-vafā hai to kis ummīd pe ai 'shauq'
tū dād-talab us se ki bedād-talab hai

maanā ki tum ummīd-e-vafā ke nahīñ qaa.il
phir kyā mire jiine kā koī aur sabab hai

bhūle se bhī na jānib-e-aġhyār dekhnā
shart-e-vafā yahī hai ḳhabardār dekhnā

'jauhar' kahīñ biktī hī nahīñ jins-e-mohabbat
kyā qaht vafā kā sar-e-bāzār paḌā hai

parastār-e-vafā koī nahīñ bāzār-e-ulfat meñ
ḳharīdārī nahīñ jis kī vo saudā ho ga.e ham tum