Tags-Wafa

yār-e-paimāñ-shikan aa.e agar ab ke to use
koī zanjīr-e-vafā ai shab-e-va.ada pahnā

mohabbat ahd-o-paimān-e-vafā hai
mohabbat hadd-e-imkān-e-vafā hai

'firāq' rāh-e-vafā meñ subuk-ravī terī
baḌe-baḌoñ ke qadam Dagmagā.e haiñ kyā kyā

ham to lazzat-kash-e-āzār haiñ ai josh-e-vafā
aur haiñ vo jinheñ bedād se Dar lagtā hai

na vo ādāb-e-vafā haiñ na vo ādāb-e-junūñ
ai 'mushīr' ab dil-e-nāshād se Dar lagtā hai

mohabbat meñ ye aql zaa.il huī hai
ki ahl-e-daġhā se vafā chāhtā huuñ

ab un kī jafā.eñ nazar-andāz na hoñgī
ab merī vafā madd-e-nazar ho ke rahegī

ḳhudā kā shukr dil rāh-e-vafā meñ miTtā jaatā hai
jo faanī chiiz hai vo jāvedānī hotī jaatī hai

bā-vafā thā to mujhe pūchhne vaale bhī na the
be-vafā huuñ to huā naam bhī ghar ghar merā

iz.hār-e-vafā lāzim hī sahī ai 'arsh' magar fariyādeñ kyuuñ
vo baat jo sab par zāhir hai us baat kā charchā kyā ma.anī

iḳhlās-o-vafā ke sajdoñ kī jis dar par daad nahīñ miltī
ai ġhairat-e-dil ai azm-e-ḳhudī us dar par sajda kyā ma.anī

kis ko tāqat hai muskurāne kī
bevafā se vafā kare koī

ġhairat-e-ishq ko qubūl nahīñ
ki tujhe bevafā kahe koī

vahī ahd-e-rasm-o-rah-e-vafā vo dil-o-nazar kā mo.āmla
mujhe yaad hai mire mohtaram tumheñ yaad ho ki na yaad ho

ye milā mujh ko sila merī vafā kā sīrat
likh diyā naam mirā us ne lakīroñ kī tarah

barbād-e-vafā ho kar masjūd-e-jahāñ dil ho
aadhe meñ bane masjid aadhe meñ sanam-ḳhāna

kis se paimān-e-vafā bāñdhte ho
vaqt kā āb-e-ravāñ hai ye to

vafā kā shauq ye kis intihā meñ le aayā
kuchh aur daaġh maiñ apnī qabā meñ le aayā

khulā fareb-e-mohabbat dikhā.ī detā hai
ajab kamāl hai us bevafā ke lahje meñ

karte ho tum vafā kī bāteñ
par ham se Tuk āñkheñ chaar kiijo