Tags-Wafa

haañ magar shart-e-vafā ye hai ki pā.ūñ bhī vafā
maiñ bhī insān huuñ kamtar nahīñ rutba merā

maañ bahan huuñ kabhī biivī to kabhī beTī huuñ
koī kirdār ho mardoñ se vafā kartī huuñ

qatīl-e-rañg na hogā vo sair-chashm kabhī
vafā kī dūdhiyā bāñhoñ meñ jo rahā hogā

kuchh din ke ba.ad us se judā ho ga.e 'munīr'
us bevafā se apnī tabī.at nahīñ milī

kyā vafā o jafā kī baat kareñ
darmiyāñ ab to kuchh rahā bhī nahīñ

ashk-e-ravāñ kī nahr hai aur ham haiñ dosto
us bevafā kā shahr hai aur ham haiñ dosto

dekhe dayār-e-husn ke meñ kārvāñ bahut
lekin kaso ke paas matā-e-vafā na thī

ḳhud hī nādim huuñ vafā par apnī
us tabassum kī zarūrat kyā hai

āḳhirī sham.a huuñ maiñ bazm-e-vafā kī logo
chāhe jalne do mujhe chāhe bujhā do mujh ko

haqīqat ye hai ham kyā uTh ga.e haiñ
vafā duniyā se ruḳhsat ho ga.ī hai

kisī tarah jo na us but ne e'tibār kiyā
mirī vafā ne mujhe ḳhuub sharmsār kiyā

mohabbat ke jogī sitam ke birogī vafā ke bhikārī jafā ke pujārī
jahāñ dekh paate haiñ jalva butoñ kā bichhāte haiñ apnā vahīñ mirg-chhālā

ham arz-e-vafā bhī kar na sake kuchh kah na sake kuchh sun na sake
yaañ ham ne zabāñ hī kholī thī vaañ aañkh jhukī sharmā bhī ga.e

mohabbat ik musalsal hādisa thī
hamāre be-vafā hone se pahle

'ahmad' na soch kuchh ki zamāna hai bevafā
ye din badal gayā to hamārā banegā kyā

fuġhāñ ke saath tire rāhat-e-qarār chale
navā-garān-e-vafā himmatoñ ko haar chale

vo nā-āshnā bevafā merī zid se
zamāne kā ab āshnā ho rahā hai

'nasīm' ham se hai zinda jahāñ meñ nām-e-vafā
hamāre ba.ad zamāna badal chukā hogā

jis ko mauhūm lakīroñ kā muraqqa.a kahiye
lauh-e-dil par thā yahī naqsh-e-vafā kyā karte

vafā kā naam to pīchhe liyā hai
kahā thā tum ne is se peshtar kyā