Tags-Wafa

dasht-e-vafā meñ ābla-pā koī ab nahīñ
sab jā rahe haiñ sāya-e-dīvār kī taraf

vafūr-e-balā hai hujūm-e-vafā hai
salāmat malāmat malāmat salāmat

alarraġhm-e-dushamn shahīd-e-vafā huuñ
mubārak mubārak salāmat salāmat

maiñ ek baab thā afsāna-e-vafā kā magar
tumhārī bazm se uTThā to ik kitāb banā

ġham ke sahrā kī tapish ḳhud jhelnī hogī hameñ
bevafā ahbāb haiñ saa.e se ḳhālī chhatriyāñ

jo vafā kā rivāj rakhte haiñ
sāf-suthrā samāj rakhte haiñ

kah baiThiyo na 'dard' ki ahl-e-vafā huuñ maiñ
us bevafā ke aage jo zikr-e-vafā chale

vafā na TūTne vaalī hai ek shai 'shāriq'
karo vafā ko na ta.abīr kachche dhāge se

ab huī zamāne meñ sheva-e-vafā kī qadr
ālam-āshnā hai vo dushman-e-vafā ho kar

chalo yuuñ sahī merā dil dil nahīñ thā
vafā kā lahū us meñ shāmil nahīñ thā

guzarne ko to kāj-o-vākaj apnī guzre hai
jafā jo un ne bahut kī to kuchh vafā kam kī

patthar kī lakīr hai naqsh-e-vafā ā.īna na jaano talvoñ kā
lahrāyā kare rañgīñ-sho.ala dil palTe khānā kyā jaane

mirī vafā ke sivā ġhāyat-e-jafā kyuuñ ho
tirī jafā ke sivā hāsil-e-vafā ma.alūm

aarzū hai vafā kare koī
jī na chāhe to kyā kare koī

ham par jafā se tark-e-vafā kā gumāñ nahīñ
ik chheḌ hai vagarna murād imtihāñ nahīñ

ham ummīd-e-vafā pe terī hue
ġhuncha-e-dair chīda ke mānind

unhīñ ko arz-e-vafā kā thā ishtiyāq bahut
unhīñ ko arz-e-vafā nā-gavār guzrī hai

hai vo vahshat ki havā bhī nahīñ chaltī 'at.har'
ban gayā kitnā bhayānak ye vafā kā āñgan

bā-vafā thā to mujhe pūchhne vaale bhī na the
be-vafā huuñ to huā naam bhī ghar ghar merā

jo samajh liyā tujhe bā-vafā to phir is meñ terī bhī kyā ḳhatā
ye ḳhalal hai mere dimāġh kā ye mirī nazar kā qusūr hai