Tags-Wafa

lailā kā naam zinda hai ab tak jahāñ meñ
tum bhī nibāh do kisī ahl-e-vafā ke saath

ummīd-e-vafā ke pesh-e-nazar maiñ un kī jafā.eñ bhuul gayā
hai mustaqbil par aañkh mirī maazī ko bhulātā jaatā huuñ

husn ke saath tujhe husn-e-vafā bhī miltā
isī halqe kī zarūrat tirī zanjīr meñ hai

sitam ko un kā karam kaheñ ham jafā ko mehr-o-vafā kaheñ ham
zamāna is baat par ba-zid hai ki nāravā ko ravā kaheñ ham

dil hirāsāñ hai bahut dekh ke anjām-e-vafā
ai mirī hasrat-e-nākām gila kis se karūñ

kyā zikr-e-vafā jafā kisī se na banī
gar dost milā to mudda.ī se na banī

hai bāġh-e-mohabbat meñ vafā kā jo hasīñ gul
murjhā jo gayā phir to khilā.e na khile hai

TuuTā jo bharam rishtoñ meñ ehsās-o-vafā kā
sau tarah nibhāo to nibhā.e na nibhe hai

ravā hai ishq meñ ravā magar ye sajda-e-vafā
azaan ke baġhair bhī namāz ke baġhair bhī

va.ada karte ho vafā karte ho kyā karte ho
jurm-e-qānūn-e-jafā karte ho kyā karte ho

ham se paimān-e-vafā karte ho kyā karte ho
tark dastūr-e-vafā karte ho kyā karte ho

jaan ik but pe fidā karte ho kyā karte ho
phir bhī ummīd-e-vafā karte ho kyā karte ho

ham ne bhī chhoḌ diyā maslak-e-arbāb-e-vafā
vo bhī ab bhuul ga.e sheva-e-bedād-garī

jab baat vafā kī aatī hai jab manzar rañg badaltā hai
aur baat bigaḌne lagtī hai vo phir ik va.ada karte haiñ

kyuuñ baiThe haath malte ho ab 'yās' kyā huā
is bevafā shabāb par itnā ġhurūr thā

us ke kūche se jo uTh ahl-e-vafā jaate haiñ
tā-nazar kaam kare rū-ba-qafā jaate haiñ

gar dil ko bas meñ paa.eñ to nāseh tirī suneñ
apnī to marg-o-zīst hai us bevafā ke haath

aap ke lab pe aur vafā kī qasam
kyā qasam khaa.ī hai ḳhudā kī qasam

vafā-kesh-o-vafā-nā-āshnā kyā
mohabbat meñ balāoñ kā gila kyā

mahfil meñ shanāsā bhī banā baiThā hai anjān
us shaḳhs kī majbūr vafā achchhī lagī hai