Tags-Wafa

rah-e-vafā meñ unhīñ kī ḳhushī kī baat karo
vo zindagī haiñ to phir zindagī kī baat karo

jin ko hai tauq-o-salāsil ke taqāzoñ kā shu.ūr
vahī pābandi-e-ā.īn-e-vafā karte haiñ

ham vo nādān havāoñ se vafā kī ḳhātir
apne āñgan ke charāġhoñ ko bujhāne lag jaa.eñ

ġharaz is nibāh ke sadqe meñ ġharaz aisī chaah ke sadqe meñ
na tirā hī jaur-o-jafā gayā na mirī hī mehr-o-vafā ga.ī

maiñ ne chāhā thā ki andoh-e-vafā se chhūTūñ
vo sitamgar mire marne pe bhī raazī na huā

muqaddas sahī kārobār-e-vafā
magar is meñ nuqsān-e-jāñ hai miyāñ

tum apne rañg nahāo tum apnī mauj uḌo
magar hamārī vafā bhī nigāh meñ rakhnā

mohabbat kareñ bhī to kis se kareñ
zamāna baḌā bevafā ho gayā

aap mujh se nibāheñge sach hai
bā-vafā husn o bevafā hai ishq

hai lutf taġhāful meñ yā jī ke jalāne meñ
vaada to kiyā hotā go vo na vafā hotā

dil hī aisā hai bā-vafā 'momin'
bevafā se bhī jo vafā karegā

'manzar'-e-sāda-dil jinheñ dost samajh rahe the tum
aaj vahī vafā-sarisht ho ga.e ham se duur duur

ham ne har tarah se dil-e-ḳhūn kiyā hai apnā
ātish-e-mai se kabhī jurm-e-vafā se khele

kyā maiñ tire is lutf ke qābil bhī nahīñ huuñ
ai jān-e-vafā dil hī dukhāne ke liye aa

ā.īn-e-vafā itnā bhī saada nahīñ hotā
har baar masarrat kā i.aada nahīñ hotā

us dushman-e-vafā ko duā de rahā huuñ maiñ
merā na ho sakā vo kisī kā to ho gayā

ik hamīñ silsila-e-shauq sambhāle hue haiñ
vo to sab ahd-e-vafā hashr pe Taale hue haiñ

azīzo bā-vafā fazl-e-ḳhudā se
maqām-e-bandagī apnā chukī huuñ

'ishratī' ghar kī mohabbat kā mazā bhuul ga.e
khā ke london kī havā ahd-e-vafā bhuul ga.e

vaqt-e-āḳhir aur ye qaul-e-vafā
dam vo dete ho ki bas tauba bhalī