Tags-Waiz

kahne sunñe kā nahīñ ye vaqt jā vaa.iz kahīñ
ālam-e-mastī meñ apnī guftugū kuchh aur hai

shaiḳh-o-barahman zāhid-o-vā.iz būḌhe-khūsaT kyā jāneñ
bhuul bhī ho jaatī hai is meñ is kā naam javānī hai

vo mohtasib ho ki vaa.iz vo falsafī ho ki shaiḳh
kisī se band tirā rāz-dāñ nahīñ hotā

kahāñ mai-ḳhāne kā darvāza 'ġhālib' aur kahāñ vaa.iz
par itnā jānte haiñ kal vo jaatā thā ki ham nikle

kū-e-jānāñ kūcha-e-jānāñ thā phir
jannat-e-vā.iz ko Thukrānā paḌā

ek zarā se hashr pe vaa.iz us ko Darātā allāh allāh
jis ne butoñ kī galī meñ barsoñ roz-e-qayāmat barpā dekhī

is mai-kade meñ uchhlī hai dastār bār-hā
vaa.iz yahāñ kahāñ se numūdār ho ga.e

jā.ūñ ka.abe ko maiñ kis tarah se ai vā.iz-e-shahr
aa gayā mujh ko to ab ḳhāna-e-ḳhummār pasand

jaise dozaḳh kī havā khā ke abhī aayā ho
kis qadar vā.iz-e-makkār Darātā hai mujhe

aisī hai ki pī sakegā vaa.iz
hai taaza kashīd aaj hī kī

vaa.iz butoñ ko ḳhuld meñ le jā.eñge kahīñ
hai vaada kāfiroñ se azāb-e-alīm kā

vaa.iz kabhī hilā nahīñ kū-e-sanam se maiñ
kyā jānūñ kyā hai martaba arsh-e-azīm kā

vaa.iz baḌā mazā ho agar yuuñ azaab ho
dozaḳh meñ paañv haath meñ jām-e-sharāb ho

shirk hai shirk ye ai vā.iz-e-āshufta-ḳhayāl
ġham-e-uqbā ko sharīk-e-ġham-e-duniyā bhī na kar

masnad-e-zar pe baiThā hai vaa.iz
khīñseñ nikāle chañdiyā ghaTā.e

ḳhudā kī rahmat pe bhuul baiThūñ yahī na ma.anī hai is ke vaa.iz
vo abr kā muntazir khaḌā ho makān jaltā ho jab kisī kā

ham bāda-kash to mai ko samajhte haiñ zindagī
ai vā.iz-e-buzurg tirā kyā ḳhayāl hai

laakh murtad sahī be-dīn nahīñ haiñ vaa.iz
but na.e haiñ to ḳhudā kyā na nayā lā.eñge ham

pī ke ai vaa.iz nadāmat hai mujhe
paanī paanī huuñ tirī taqrīr se

umīd-e-hūr ne sab kuchh sikhā rakkhā hai vaa.iz ko
ye hazrat dekhne meñ sīdhe-sādhe bhole bhāle haiñ