Tags-Waiz

yahāñ to tark-e-sharāb se ḳhud dil-o-jigar phuñk rahe haiñ vaa.iz
sunā ke dozaḳh kā zikr-e-nāhaq jale ko tū bhī jalā rahā hai

vaa.iz use batāo na jannat ke tum maze
ḳhuld-e-barīñ kā lutf jise kū-e-yār de

vahdat-e-sūrat-o-ma.anī ko samajh ai vaa.iz
husn-e-yazdāñ kā tasavvur ruḳh-e-ādam se milā

hai ye rindoñ ke ta.āqub meñ koī raaz amiiq
varna auroñ se bhī vaa.iz kī shanāsā.ī hai

zikr-e-jānāñ kar jo tujh se ho sake
vaa.iz ehsāñ kar jo tujh se ho sake

mai-e-gul-gūñ hai saaqī hai 'sahar' vaa.iz se kahtā hai
abhī farmā.eñ mujh se aap jo farmāne aa.e haiñ

vaa.iz ne zikr-e-va.ada-e-firdaus kyuuñ kiyā
us rind se jo nashsha-e-vahdat se chuur thā

vaa.iz na tum piyo na kisī ko pilā sako
kyā baat hai tumhārī sharāb-e-tuhūr kī

ishq o mohabbat kyā hote haiñ kyā samjhā.ūñ vaa.iz ko
bhaiñs ke aage biin bajānā mere bas kī baat nahīñ

mahfil mahfil zikr hamārā soch samajh ke kar vaa.iz
apne muḳhālif bhī haiñ kitne aur haiñ kitne haamī bhī

merī sharāb kī kyā qadr tujh ko ai vaa.iz
jise maiñ pī ke duā duuñ vo jannatī ho jaa.e

pī shauq se vaa.iz are kyā baat hai Dar kī
dozaḳh tire qabze meñ hai jannat tire ghar kī

vaa.iz salām le ki chalā mai-kade ko maiñ
firdaus-e-gum-shuda kā patā yaad aa gayā

kalām-e-hazrat-e-vā.iz nasīb-e-dushmanāñ bāshad
unDelo mai piyo sāġhar kahāñ phir naujavānī hai

vaise to merī rāhoñ meñ paḌte the mai-kade
vaa.iz tirī nigāh se Darnā paḌā mujhe

ye vaa.iz kaisī bahkī bahkī bāteñ ham se karte haiñ
kahīñ chaḌh kar sharāb-e-ishq ke nashshe utarte haiñ

merī imdād sab ne farmā.ī
vā.iz-o-zāhid-o-ḳhudā ke sivā

ġham qayāmat kā nahīñ vaa.iz mujhe ye fikr hai
diin kab baaqī rahā duniyā agar faanī huī

peT meñ ḳhum ke hai jo kuchh vo bharā hai is meñ
muñh na khulvā are vaa.iz mire paimāne kā

mai kī bābat ḳhayāl kar vaa.iz
is meñ naf.e bhī haiñ zarar hī nahīñ