Tags-Waiz

vaa.iz kare hai nekiyāñ lālach meñ huur kī
tab hī to us kī baat hai tāsīr ke baġhair

tirī duniyā ko ai vaa.iz mirī duniyā se kyā nisbat
tirī duniyā meñ taqdīreñ merī duniyā meñ tadbīreñ

vaa.iz butān-e-dair se nafrat na kījiye
kaj-bahsī-e-majāz-o-haqīqat na kījiye

vaa.iz banā hai mai-kash
kyā kyā taġhayyur aa.e

is ittifāq ko fazl-e-ḳhudā samajh vaa.iz
ki hajv-e-mai tire lab par thī mujh ko hosh na thā

vaa.iz na tum piyo na kisī ko pilā sako
kyā baat hai tumhārī sharāb-e-tahūr kī

tan ke ujle man ke maile
ye haiñ vaa.iz jī ke lachchhan

mai-kade ke qarīb ham vaa.iz
terī zid se makān lete haiñ

butoñ kā zikr karo vaa.iz ḳhudā ko kis ne dekhā hai
sharār-e-sañg-e-mūsā ke liye barq-e-tajallā hai

asal meñ jalva ye kis kā hai tū hī kah vaa.iz
terā rab aur sahī merā sanam aur sahī

is qadar qaht-e-basīrat bhī nahīñ ai vaa.iz
ham butoñ ke liye nikleñ to ḳhudā bhī na mile

vaa.iz tū sune bole hai jis roz kī bāteñ
us roz ko ham ne shab-e-hijrān meñ dekhā

ham but-kade meñ rah ke bhī īmāñ-parast haiñ
vaa.iz haram meñ rah ke musalmāñ hue to kyā

sambhāl vaa.iz zabān apnī ḳhudā se Darā ik zarā hayā kar
butoñ kī ġhībat ḳhudā ke ghar meñ ḳhudā ḳhudā kar ḳhudā ḳhudā kar

koī ye pūchhe ki vaa.iz kā kyā bigaḌtā hai
jo be-amal pe bhī rahmat vo be-niyāz kare

biThā ke arsh pe rakkhā hai tū ne ai vaa.iz
ḳhudā vo kyā hai jo bandoñ se ehtirāz kare

ġhurūr-e-zohd ne sikhlā diyā hai vaa.iz ko
ki bandagān-e-ḳhudā par zabāñ darāz kare

muzhda-bād ai bāda-ḳhvāro daur-e-vā.iz ho chukā
madrase khode ga.e ta.amīr mai-ḳhāna huā

kabhī masjid meñ jo vaa.iz kā bayāñ suntā huuñ
yaad aatī hai mujhe pīr-e-ḳharābāt kī baat

yaar bad-mast huā sab pe chhiḌaktā hai sharāb
tah kar ai vā.iz-e-shahr apnī kitāb aaj ke din