Tags-Waiz

saḳhtiyāñ rindoñ pe karte karte
aql par paḌ ga.e patthar vaa.iz

le ke āñkhoñ se lagātā sāġhar
paḌh jo letā ḳhat-e-sāġhar vaa.iz

band kartā hai dar-e-tauba kyuuñ
khol kar va.az kā daftar vaa.iz

maut bhī aatī hai to hiile se
aa gayā rindoñ meñ kyūñkar vaa.iz

zikr-e-mai va.az meñ jab aatā hai
jhūmtā hai sar-e-mimbar vaa.iz

mai to jaa.ez nahīñ ye jaa.ez hai
roz khātā hai mirā sar vaa.iz

kis tarah piite haiñ piine vaale
dekh lenā lab-e-kausar vaa.iz

shīsha-e-dil kā ḳhudā hāfiz hai
terī har baat hai patthar vaa.iz

baiTh jā kar sar-e-mimbar vaa.iz
ho gayā tū to mire sar vaa.iz

dekh kis rañg se uTThī hai ghaTā
tah kar ab va.az kā daftar vaa.iz

tumhāre va.az meñ tāsīr to hai hazrat-e-vā.iz
asar lekin nigāh-e-nāz kā bhī kam nahīñ hotā

vaa.iz ne bhare ḳham chuur kiye tar kar dī zamīñ ai pīr-e-muġhāñ
zālim ne zarā bhī terā lihāz ai rahbar-e-īmāñ kuchh na kiyā

diin idhar duniyā udhar aur beach meñ vaa.iz kā va.az
pher leñ 'shaukat' nazar ham apnī paimāne se kyā

vaa.iz ke paas jā.eñge ham mai piye hue
muddat huī hai tauba se tauba kiye hue

ye dīdanī hai mai-kada meñ josh-e-be-ḳhudī
aa.e haiñ aaj hazrat-e-vā.iz piye hue

koī ilāj-e-ġham-e-zindagī batā vaa.iz
sune hue jo fasāne haiñ phir sunā na mujhe

kaun kāfir hai ye jab pūchhā gayā vaa.iz se
auj-e-mimbar se sadā aa.ī ki saare saare

'ġhālib' burā na maan jo vaa.iz burā kahe
aisā bhī koī hai ki sab achchhā kaheñ jise

jaan sunñe vāloñ kī vaa.iz laboñ par aa ga.ī
vaah kyā kahnā hai hazrat aap kī guftār kā

le chalo vaa.iz ko hāthoñ-hāth uThā.e mai-kasho
pāsbāñ chal kar banā do ḳhāna-e-ḳhummar kā