Tags-Yaad

kabhī yaad un kī aa.ī hai kabhī vo ḳhud bhī aate haiñ
mohabbat meñ hijāb-e-darmiyāñ baaqī nahīñ rahtā

begār banā Daalā hai ik yaad ko tū ne
ye kaam kisī shaam suhānī ke liye hai

akele haiñ vo aur jhuñjhlā rahe haiñ
mirī yaad se jañg farmā rahe haiñ

ab tirī yaad hī taskīn-e-dil-o-jāñ hai mujhe
ab tire dard ke bistar pe bhī so letā huuñ

jab bhī mil jaatī hai fursat ġham-e-duniyā se 'shakeb'
yaad kar ke unheñ tanhā.ī meñ ro letā huuñ

ek tasvīr āñkhoñ meñ aatī huī ek jaatī huī
phir vahī shaam hai phir vahī yaad hai dil dukhātī huī

jo sarguzisht apnī ham kaheñge koī sunegā to kyā kareñge
jo yaad ā.eñgī terī bāteñ to chup hī pahroñ rahā kareñge

kise ġharaz hai phir aap ko kyuuñ sanam kā bandā kahā kareñge
jo yūñhī ham ko bhulā.eñge vo to ham bhī yād-e-ḳhudā kareñge

vahī be-ḳhabarī vahī jīvan kā be-ant safar aur aise meñ
koī apnī yaad dilātā hai par jaane kaun dilātā hai

mustarad ho gayā jab terā qubūlā huā maiñ
yaad kyā ā.ūñgā is tarah se bhūlā huā maiñ

kis kī chashm-e-mast yaad aatī rahī
niiñd āñkhoñ se mirī jaatī rahī

umr-bhar 'nāzir' rahe sahrā-navard
bazm-e-gulshan garche yaad aatī rahī

vo shaam Dhale terā milnā vo terā hañsānā yaad nahīñ
jo terī rifāqat meñ guzrā ham ko vo zamānā yaad nahīñ

manzil hai kahāñ kuchh yaad nahīñ kis samt hai jaanā yaad nahīñ
ab terā pata ham kyā pūchheñ ḳhud apnā Thikānā yaad nahīñ

kyā tujh se bahāna koī kareñ ab koī bahānā yaad nahīñ
ham aa to ga.e mahfil meñ tirī par der se aanā yaad nahīñ

ai ahl-e-zamāna zid na karo vo daur purānā yaad nahīñ
ab un kī kahānī kyā kahiye ḳhud apnā fasāna yaad nahīñ

vo chāñdnī-shab phūloñ kī mahak vo ThanDī havāoñ ke jhoñke
tū itnī jaldī bhuul gayā mausam vo suhānā yaad nahīñ

vo raat vo bārish tūfānī us raat kā manzar yaad to kar
vo ik duuje ko mīThī Dish kyā tum ko khilānā yaad nahīñ

ilzām-tarāshī to 'sāġhar' duniyā kā purānā sheva hai
yūsuf pe zamāne kā tujh ko kyā uñglī uThānā yaad nahīñ

phir tirī yaad meñ āñhkeñ huiiñ shabnam shabnam
phir vahī niiñd na aane ke zamāne aa.e