Tags-Yaad

taarī huā hai lamha-e-maujūd is tarah
kuchh bhī na yaad aa.e agar yaad kuchh karūñ

chamakne lagtī hai har chiiz mere kamre kī
tumhārī yaad koī phuljhaḌī sī lagtī hai

tumhārī yaad ko jab bhī gale lagātā huuñ
mire badan meñ koī sansanī sī lagtī hai

yaad karnā har ghaḌī us yaar kā
hai vazīfa mujh dil-e-bīmār kā

titliyāñ pakaḌne kā aa gayā zamāna yaad
tez tez baḌhte ham duur duur haTtī raat

yaad hai itnā ki ubhrā thā koī aks-e-jamīl
aur phir yādoñ ke saare ā.īne dhundlā ga.e

zindagī bhī hai tumhāre ġham ke pas-e-manzar kī den
jab bhī maiñ jiine se tañg aayā huuñ tum yaad aa ga.e

ye ghar ye galī zehn meñ kar lījiye mahfūz
mumkin hai kabhī aap ko yaad aa.e hamārī

yaad thā 'suqrāt' kā qissa sabhī ko 'ehtirām'
sochiye aise meñ baḌh kar sach ko sach kahtā to kaun

us ke chehre pe tabassum kī ziyā aa.egī
vo mujhe yaad karegā to hayā aa.egī

kis qadar bikhrā huā huuñ maiñ bichhaḌ ke tujh se
yaad ab kis kī mujhe tere sivā aa.egī

jab jaam diyā thā saaqī ne jab daur chalā thā mahfil meñ
ik hosh kī saa.at kyā kahiye kuchh yaad rahī kuchh bhuul ga.e

dekhe jo chashm-e-zār ki sailāb-hā-e-ḳhūñ
yaad aa.e dast-o-pā-e-hinā.ī tamām-rāt

chup huuñ tumhārā dard-e-mohabbat liye hue
sab pūchhte haiñ tum ne zamāne se kyā liyā

ġhauġhā-e-hashr dil meñ samātā nahīñ mire
hañgāma yaad hai mujhe furqat meñ aah kā

yaad kis kī mah-o-ḳhurshīd liye aa.ī hai
shab-e-tārīk meñ aaj itnā ujālā kyuuñ hai

yaad rakhnā hī mohabbat meñ nahīñ hai sab kuchh
bhuul jaanā bhī baḌī baat huā kartī hai

kyuuñ na chīḳhūñ ki yaad karte haiñ
merī āvāz gar nahīñ aatī

thī yaad kis dayār kī jo aa ke yuuñ rulā ga.ī
bas ek pal meñ jaise zindagī bhī Dagmagā ga.ī

tumhārī yaad nikaltī nahīñ mire dil se
nasha chhalaktā nahīñ hai sharāb se bāhar