Tags-Yaad

sar-e-niyāz rahā zer-e-pā-e-yād mudām
hinā kī tarah maiñ qadmoñ se kab lagā na rahā

vo phuul se lamhe bhārī haiñ ab yaad ke nāzuk shānoñ par
jo pyaar se tum ne sauñpe the āġhāz meñ ik dīvāne ko

na pūchho pichhle pahar apnī yaad kā aalam
tumhārā zikr sitāroñ se baar baar kiyā

jab andāz bahāroñ ke yaad aate haiñ
ham kāġhaz par kyā kyā phuul banāte haiñ

kyā zarroñ kā josh sabā ne chhīn liyā
gulshan meñ kyuuñ yaad bagūle aate haiñ

baiTh ke ro.eñ kis ko fursat hai 'bāqī'
bhūle-bisre qisse yaad to aate haiñ

tumhārī yaad taarī ho rahī hai
baḌī hī yādgārī ho rahī hai

mujhe raas vīrāniyāñ aa ga.ī haiñ
tirī yaad bhī ab satātī nahīñ hai

zikr-e-māzī se gurezāñ huuñ ye sach hai lekin
yaad hai aaj bhī mujh ko tirā paimāñ jānāñ

maiñ tujhe bhuul na paayā to ye chāhat hai mirī
yaad rakkhā hai jo tū ne tirā ehsāñ jānāñ

yuuñ mire ḳhayāloñ meñ terī yaad raqsāñ hai
jis tarah fazāoñ meñ gūñjtī hai shahnā.ī

jo hameñ bhuul gayā hai zālim
us ko ham yaad kiyā karte haiñ

kise niiñd aatī hai ai sanam tire tāq-e-abrū kī yaad meñ
kabhī ā.shnā-e-tah-e-baġhal sar-e-murġh-e-qibla-numā nahīñ

dil-girafta hī sahī bazm sajā lī jaa.e
yād-e-jānāñ se koī shaam na ḳhālī jaa.e

yaad karne kā tumheñ koī irāda bhī na thā
aur tumheñ dil se bhulā deñ ye gavārā bhī na thā

jaane kitne chāñd taare raat ke jañgal meñ the
yaad lekin ek jugnū kā ujālā hai mujhe

mohabbat meñ koī sadma uThānā chāhiye thā
bhulāyā thā jise vo yaad aanā chāhiye thā

maañ yaad tirī dil se bhulā.ī nahīñ jaatī
sūrat tirī āñkhoñ se haTā.ī nahīñ jaatī

pardes meñ ab kaun tujhe yaad karegī
ḳhat likkhegī na likkhūñ to fariyād karegī

hijr ke tapte mausam meñ bhī dil un se vābasta hai
ab tak yaad kā pattā pattā Daalī se paivasta hai