Tags-Yaad

vafā kī kaun sī manzil pe us ne chhoḌā thā
ki vo to yaad hameñ bhuul kar bhī aatā hai

ā.īna gir paḌā thā mire haath se kabhī
phir yaad hādsa nahīñ koī zamīr kā

yaad sab kuchh hai magar kuchh bhī nazar aatā nahīñ
putliyoñ meñ tere chehre ko chhupā.ūñ kis tarah

jo yaad aa.eñ to dil ġham se phaTne lagtā hai
kisī aziiz kī palkoñ meñ vo jaḌe aañsū

dard ḳhāmosh rahā TūTtī āvāz rahī
merī har shaam tirī yaad kī hamrāz rahī

sar uThā kar chalne kī ab yaad bhī baaqī nahīñ
mere jhukne se merī zillat kā andāza lagā

maiñ tā.ir-e-vajūd yā barg-e-ḳhayāl thā
bas is qadar hai yaad ki maiñ Daal Daal thā

dil ko dil se raah hai to jis tarah se ham tujhe
yaad karte haiñ kare yuuñ hī hameñ bhī yaad tū

taare ginvātī haiñ phir hijr kī kaalī rāteñ
jab mujhe yaad koī zohra-jamāl aatā hai

āshnā kaun hai naqsh-e-qadam-e-nik.hat kā
yaad kis ko hai tire ghar kā patā merī tarah

kuchh bhī yaad nahīñ ab paḌtā kab pardes ko nikle the
shāyad shaam lagī thī Dhalne yā shāyad chaḌhtā din thā

vo umañgeñ nahīñ ab vo dil-e-nāshād nahīñ
vāqi.a ḳhvāb sā kuchh yaad hai kuchh yaad nahīñ

tābish-e-husn se ik be-ḳhudī chhā.ī pahle
baad us ke huā phir kyā ye mujhe yaad nahīñ

ulajh gayā huuñ kuchh aisā ki yaad bhī to nahīñ
ye vahm pahle-pahal kaise dil meñ aayā thā

yaad ayyāme ki apne roz o shab kī jā-e-bāsh
yā dar-e-bāz-e-bayābāñ yā dar-e-mai-ḳhāna thā

sub.h hote vo binā-gosh aaj yaad aayā mujhe
jo girā dāman pe aañsū gauhar-e-yak-dāna thā

aap ne ahd kiyā hai mirī ġham-ḳhvārī kā
ab ijāzat ho to ye ahd mujhe yaad rahe

vo ḳhudā.ī ho to ho shān-e-tajallī to nahīñ
jis tajallī meñ nigāhoñ ko ḳhudā yaad rahe

vo haram ho yā ki ho but-kada ki vo sañg-e-dar ho habīb kā
jahāñ terī yaad na aa sake vahāñ sajda karnā harām hai

terī yaad aur tere dhyān meñ guzrī hai
saarī zindagī ek makān meñ guzrī hai