Tags-Yaad

abhī āb-o-gil meñ guñdhī
aur abhī parda-e-ġhaib se jhāñktī yād-dāsht

tum ne fāsloñ kī baat samajh lī to tumheñ yaad aa.egā
ki fanā ham sab kī taqdīr hai

baiThā huuñ us kī yaad meñ bhūlā huuñ ġhair ko
zāhid agar nahīñ huuñ riyā-kār bhī nahīñ

tumhārī yaad hī ke saath dhaḌkan baḌh ga.ī dil kī
tasavvur se mizāj-e-husn to barham nahīñ hotā

tumheñ yaad maiñ na karūñ kabhī tumheñ apne dil se nikāl duuñ
yahī kaam mujh se na ho sakā mirī zindagānī guzar ga.ī

guzar ke aayā huuñ un saḳht manziloñ se jahāñ
tumhārī yaad kā saaya bhī ās-pās na thā

biphartī mauj ke aage ye kis ko yaad rahā
kahāñ pe naav ga.ī aur kahāñ kinārā gayā

har ek naqsh tirī yaad se munavvar thā
maiñ apne maazī meñ kal raat jab dobāra gayā

firāq-e-yād meñ guzrā hai jaise saarā din
yuuñ hī kaTegī ba-sad āh-o-be-qarārī raat

saath sāhil pe guzarte hue dekhī thī kabhī
yaad hai ab bhī samundar meñ utartī huī shaam

azal meñ ik tajallī se huī thī be-ḳhudī taarī
tumhīñ ko maiñ ne dekhā thā kuchh aisā yaad hotā hai

ye aur baat ki tū ne bhulā diye haiñ magar
hameñ to yaad haiñ tere karam mohabbat meñ

kabhī rote rote hañsā diyā kabhī hañste hañste rulā diyā
tirī yaad hī se hai har ḳhushī tire zikr hī se malāl hai

jaane kis kaam meñ masrūf rahā barsoñ tak
yaad aayā hī nahīñ tujh ko bhulānā mire dost

is mulāqāt meñ jo ġhair-zarūrī ho jaa.e
yaad rahtā hai kise haath milānā mire dost

is kahānī meñ kise kaun kahāñ chhoḌ gayā
yaad aa jaa.e to mujh ko bhī batānā mire dost

phir kabhī yaad kī had bharī kāmnā
āhaToñ hī se dil ko lagāne lagī

yaad kahāñ rakhnī hai terā ḳhvāb kahāñ rakhnā hai
dil meñ yaad phir āñkhoñ meñ mahtāb kahāñ rakhnā hai

baiThe-baiThe ik dam se chauñkātī hai
yaad tirī kab dastak de kar aatī hai

guzar ga.ī hai magar roz yaad aatī hai
vo ek shaam jise bhūlne kī hasrat hai