Tags-Yaad

yaad jab aayā koī va.ada-e-ta.amīr mujhe
maiñ ne tab jism kī har por ko me.amār kiyā

kaun rah rah ke yaad aatā hai
dil meñ rahtī hai bekalī kaisī

phir aaj umr-e-guzishta kī yaad aa.ī hai
phir apne maazī kī tasvīreñ dekh kar rakh diiñ

kyā batā.eñ jo guzartī hai hamāre dil par
yaad aate haiñ jab apnoñ ke sitam raat ga.e

rok letī hai tirī yaad sahārā ban kar
Dagmagāte haiñ agar mere qadam raat ga.e

aatā hai yaad phuul ke dekhe siiñ gul-badan
āshiq kā chhīltī hai jigar bulbuloñ kī haañk

va.ada kyuuñ karte ho kah doge abhī
yaad kis ko hai kabhī kī baat hai

abhī gumāñ tak nahīñ hai 'sājid' use maiñ phir yaad bhī karūñgā
magar ye kyuuñ aa.ine se haT kar vo aks bhī haath mal rahā hai

jis ek chiiz se terā firāq āsāñ hai
vo ek chiiz tirī yaad ke sivā bhī nahīñ

paḌhte phireñge galiyoñ meñ in reḳhtoñ ko log
muddat raheñgī yaad ye bāteñ hamāriyāñ

dayār-e-hind thā gahvāra yaad hai hamdam
bahut zamāna huā kis ke kis ke bachpan kā

bāzār kā to hosh hai lekin nahīñ ye yaad
kal raat kaun chhoḌ gayā mere ghar mujhe

kisī kī yaad satātī hai raat din tum ko
kisī ke pyaar se majbūr ho ga.ī ho tum

tum us kī yaad bhulā do ki bevafā hai vo
har ek dil nahīñ hotā tumhāre dil kī tarah

kyā sitam hai ki vo zālim bhī hai mahbūb bhī hai
yaad karte na bane aur bhulā.e na bane

pukārā jab mujhe tanhā.ī ne to yaad aayā
ki apne saath bahut muḳhtasar rahā huuñ maiñ

yuuñ hī yād-e-ḳhudā aa jaatī hai mujh ko kabhī 'sho.ala'
ki jaise sote sote ḳhvāb se bedār ho jaanā

yād-e-lab-e-jānāñ hai charāġh-e-dil-e-ranjūr
raushan hai ye ghar aaj usī la.al-e-yamanī se

ḳhud mujh ko bhī tā-der ḳhabar ho nahīñ paa.ī
aaj aa.ī tirī yaad is āhista-ravī se

kuchh aisā dhuāñ hai ki ghuTTī jaatī haiñ sāñseñ
is raat ke ba.ad aaoge shāyad na kabhī yaad