Tags-Yaad

tā-chand 'suhail' afsurda-e-ġham kyā yaad nahīñ tārīḳh-e-haram
īmāñ ke jahāñ paḌte haiñ qadam paidā vahīñ zamzam hotā hai

bhuul jaanā nahīñ gunāh use
yaad karnā use savāb nahīñ

paḌh liyā us kī yaad kā nusḳha
us meñ shohrat kā koī baab nahīñ

ālam-e-ġhurbat meñ tanhā.ī se ghabrātā huuñ maiñ
yād-e-ahbāb-e-vatan se dil ko bahlātā huuñ maiñ

kab se maiñ kunj-e-ġham-e-dil meñ chhupā baiThā huuñ
yaad kartī hai mujhe shorish-e-daurāñ ab tak

pahle to us kī yaad ne sone nahīñ diyā
phir us kī āhaToñ ne kahā jāgte raho

jin ko tauqīr-e-rah-o-rasm-e-vafā yaad nahīñ
kyā gila un se kareñ jin ko ḳhudā yaad nahīñ

jaane aa.e bhī the ḳhushbū ke sandese mujh ko
jaane guzrī thī dabe paañv sabā yaad nahīñ

aap ne saath nibhāne kā kiyā thā va.ada
is pe kahte haiñ vo ham se ba-ḳhudā yaad nahīñ

na rahā sham-e-farozāñ meñ bhī vo sho.ala-e-ishq
aur parvānoñ ko marne kī adā yaad nahīñ

ek ummīd-e-masīhā.ī bhī āḳhir kab tak
phir na kahnā hameñ ādāb-e-vafā yaad nahīñ

sho.ala-e-gul se fanā ho ga.ī shabnam 'anjum'
merī hastī huī kyuuñ ḳhaak zarā yaad nahīñ

tum apnī yaad se kah do na jaa.e chhoḌ ke dil
ki dard-e-hijr na rakh de kahīñ maroḌ ke dil

vo jin se tark-e-ta.alluq ko ik zamāna huā
na jaane aaj vo kyuuñ yaad aa.e jaate haiñ

hameñ ujḌe nasheman kī jab apne yaad aatī hai
qafas kī tīliyāñ jaltī haiñ shāḳh-e-āshiyāñ ho kar

ab lab pe vo hañgāma-e-fariyād nahīñ hai
allāh re tirī yaad ki kuchh yaad nahīñ hai

tumhārī yaad kā gahrā ta.alluq āñsuoñ se hai
mirī palkoñ ko kyā hogī kisī sailāb kī hasrat

vo yaad hai us kī ki bhulā de do jahāñ ko
hālat ko kare ġhair vo yārāna hai us kā

tū yaad aayā aur mirī aañkh bhar ga.ī
aksar tire baġhair qayāmat guzar ga.ī

aaj ro kar to dikhā.e koī aisā ronā
yaad kar ai dil-e-ḳhāmosh vo apnā ronā