Tags-Yaad

ye bhī mujh ko yaad nahīñ ab
soyā huuñ yā jaag rahā huuñ

qatl ke fauran ba.ad magar phir
vo sab kā sab yaad rahegā

vo naġhme vo manāzir vo bahāreñ yaad haiñ mujh ko
yahī vo naqsh haiñ jo miT nahīñ sakte miTāne se

vo rāteñ aur vo sāvan kī phuvāreñ yaad haiñ mujh ko
yahī afsāne aksar kahtā rahtā huuñ zamāne se

tū mujh se duur hai lekin tujhe maiñ yaad kartā huuñ
na jab fariyād kartā thā na ab fariyād kartā huuñ

ba.ad muddat ke ḳhud ko yaad aayā
ba.ad muddat ke ghar gayā huuñ maiñ

mudām hijr-kade meñ vo yaad raushan hai
kahāñ hai ai dil-e-nākām tū ḳhasāre meñ

us kaf-e-pā ke bose kī kab mujhe raah yaad thī
badraqa-e-talab huī jur.at-e-sang-e-pā ki yuuñ

sun ke rūdād-e-alam merī vo hañs kar bole
aur bhī koī fasāna hai tumheñ yaad ki bas

yaad meñ apne yaar ke rahnā
behtar aur us se kaam kuchh bhī hai

zarā tum ab kahīñ chhup jaao har taḌap lau haiñ
ki yaad aayā hai mujh ko mazā judā.ī kā

vo vafā-o-mehr kī dāstāñ tujhe yaad ho ki na yaad ho
kabhī tū bhī thā mirā mehrbāñ tujhe yaad ho ki na yaad ho

tire lutf-e-ḳhās ne jo diyā tirī yaad ne jo atā kiyā
ġham-e-mustaqil ġham-e-jāvedāñ tujhe yaad ho ki na yaad ho

vo jo shor-e-lutf-e-suḳhan rahā vo jo zor-e-lutf-e-bayāñ rahā
mire ham-suḳhan mire ham-zabāñ tujhe yaad ho ki na yaad ho

jo tire liye mire dil meñ thā jo mire liye tire dil meñ thā
mujhe yaad hai vo ġham-e-nihāñ tujhe yaad ho ki na yaad ho

tirī dostī pe mirā yaqīñ mujhe yaad hai mire ham-nashīñ
mirī dostī pe tirā gumāñ tujhe yaad ho ki na yaad ho

vo karam-shi.ārī-e-dushmanāñ vo sitam-tarāzī-e-dostāñ
mire nukta-ras mire nukta-dāñ tujhe yaad ho ki na yaad ho

vo jo shāḳh-e-gul pe thā āshiyāñ jo thā vaj.h-e-nāzish-e-gulistāñ
girī jis pe barq-e-sharar-fashāñ tujhe yaad ho ki na yaad ho

mire dil ke jazba-e-garm meñ mire dil ke gosha-e-narm meñ
thā tirā maqām kahāñ kahāñ tujhe yaad ho ki na yaad ho

use māntā huuñ maiñ mehrbāñ haiñ tire rafīq bahut yahāñ
kabhī maiñ bhī thā tirā rāz-dāñ tujhe yaad ho ki na yaad ho