Tags-Yaad

ye jo 'arsh' shikva-tarāz hai jise harza-goī pe naaz hai
ye vahī hai shā.ir-e-ḳhush-bayāñ tujhe yaad ho ki na yaad ho

lete haiñ tirā naam hī yuuñ jāgte sote
jaise ki hameñ apnā ḳhudā yaad nahīñ hai

terī sūrat jab bhī yaad aa.ī jigar taḌpā ga.ī
terī furqat meñ mire paañv meñ kal moch aa ga.ī

tumhārī yaad ke jab zaḳhm bharne lagte haiñ
kisī bahāne tumheñ yaad karne lagte haiñ

tirā lab dekh haivāñ yaad aave
tirā mukh dekh kan.āñ yaad aave

tire do nain jab dekhūñ nazar bhar
mujhe tab nargisistāñ yaad aave

tirī zulfāñ kī tūlānī kuuñ dekhe
mujhe lail-e-zamistāñ yaad aave

tire ḳhat kā zamurrad-rañg dekhe
bahār-e-sumbulistāñ yaad aave

tire mukh ke chaman ke dekhne suuñ
mujhe firdaus-e-rizvāñ yaad aave

tirī zulfāñ meñ yū mukh jo ki dekhe
use sham-e-shabistāñ yaad aave

jo kui dekhe mirī añkhiyāñ ko rote
use abr-e-bahārāñ yaad aave

jo mere haal kī gardish kuuñ dekhe
use girdāb-e-gardāñ yaad aave

'valī' merā junūñ jo kui ki dekhe
use koh o bayābāñ yaad aave

bhuul jaanā nahīñ gunāh use
yaad karnā use savāb nahīñ

shaam ho yā ki sahar yaad unhīñ kī rakhnī
din ho yā raat hameñ zikr unhīñ kā karnā

kis taraf aa.e kidhar bhuul paḌe ḳhair to hai
aaj kyā thā jo tumheñ yaad hamārī aa.ī

jahāñ vaale use jab yaad karnā bhuul jaate haiñ
zamīnoñ kī tahoñ meñ koī halchal bhej detā hai

aa.ī hai ab yaad kyā raat ik biite saal kī
yahī havā thī baaġh meñ yahī sadā ghaḌiyāl kī

koī bhūlā huā yaad aa rahā hai
ġham-e-derīna khaa.e jā rahā hai

ham-safīrān-e-chaman yaad to karte hoñge
par qafas tak nahīñ ātīñ vo sadā.eñ baabā