Tags-Yaad

bolte the kyā parinde se dar-o-dīvār par
yaad hai ab bhī mujhe vo apne ghar kā jāgnā

ishq ke us moḌ ko sab log kahte haiñ junūñ
dil kisī ko yaad jab shām-o-sahar karne lage

tumheñ sunā.ūñ jo yaad aa.e mujh pe kyā guzrī
ki dāstāñ to mirī mere dostāñ tum ho

yaad phir bhūlī huī ek kahānī aa.ī
dil huā ḳhuun tabī.at meñ ravānī aa.ī

yaad kā chāñd jo ubhrā to ye āñkheñ huiiñ nam
ġham kī Thahrī huī naddī meñ ravānī aa.ī

kabhī ham meñ tum meñ bhī pyaar thā tumheñ yaad ho ki na yaad ho
na kisī ke dil meñ ġhubār thā tumheñ yaad ho ki na yaad ho

ye chalī hai kaisī havā ki ab nahīñ khilte phuul milāp ke
kabhī daur-e-fasl-e-bahār thā tumheñ yaad ho ki na yaad ho

thiiñ baham nashāt kī mahfileñ thiiñ qadam meñ lutf kī manzileñ
baḌā zindagī pe nikhār thā tumheñ yaad ho ki na yaad ho

thī har ek baat meñ chāshnī haq-o-sidq-o-lutf-o-ḳhulūs kī
rah-e-haq pe chalnā shi.ār thā tumheñ yaad ho ki na yaad ho

hue laḌ ke ham se agar judā rakhī aur mulk kī ik banā
ye tumhīñ kā shauq-e-farār thā tumheñ yaad ho ki na yaad ho

huī jañg-o-harab kī ibtidā to batāo bas yahī ik patā
koī tum meñ nañg-e-vaqār thā tumheñ yaad ho ki na yaad ho

jafā kī us se shikāyat zarā nahīñ aatī
vo yaad hī hameñ shukr-e-ḳhudā nahīñ aatī

'jalāl' ham ye na māneñge tū use nahīñ yaad
tujhe kabhī koī hichkī bhī kyā nahīñ aatī

phir yaad aa ga.e vahī collage ke din mujhe
sūkhe gulāb nikle purānī kitāb se

duāoñ meñ jinheñ maañ baap yaad hī na rakheñ
amīr-e-vaqt hoñ lekin ġharīb hote haiñ

ham apne raftagāñ ko yaad rakhnā chāhte haiñ
diloñ ko dard se ābād rakhnā chāhte haiñ

aah phir dil kī yaad aa.ī hai
zarre zarre ko dekhtā huuñ maiñ

yaad aa.e chhuT ke daam se sayyād ke karam
pahuñchā do mujh ko koī mire mehrbāñ talak

vo jo chashm-e-tar meñ Thahar gayā vo sitāra jaane kidhar gayā
na nashāt-e-ġham kā hujūm ab na hī sabz yaad kī Daal hai

basī hai sūkhe gulāboñ kī baat sāñsoñ meñ
koī ḳhayāl kisī yaad ke hisār meñ hai