Tags-Yaad

ḳhāna-e-zanjīr se misl-e-sadā Dartā huuñ ab
yaad aatā hai kaf-e-pā meñ khaTaknā ḳhaar kā

yaad meñ terī raqīb-e-rū-siyah jaagā to kyā
martaba aalī na ho ḳhuffāsh-e-shab-bedār kā

tirī yaad aatī hai ab koī kahānī ban kar
yā kisī nazm ke sāñche meñ Dhalī aatī hai

phir vahī mausam-e-judā.ī hai
phir mujhe apnī yaad aa.ī hai

mirī ragoñ kā lahū bint-e-am se miltā hai
maiñ apnā aap bhī dekhūñ to yaad aa.e vo

dil meñ jo aa.e use kah Dāliye
aap kī bāteñ kareñge yaad kyā

ġhair dil se ek dam jaatā nahīñ
ham tujhe aa.eñ sitamgar yaad kyā

kyuuñ tirī qand-labī ḳhush-suḳhanī yaad aa.ī
zahar-afshānī-e-dunyā-e-danī yaad aa.ī

pa.e-gul-gasht-e-chaman phir dil-e-dīvāna chalā
phir tirī sarv-qadī gul-badanī yaad aa.ī

jab kisī jism pe sajte hue dekhā hai libās
terī ḳhush-qāmatī ḳhush-pairahnī yaad aa.ī

yuuñ nibāhā tirā vaada tire ġham ne barsoñ
ġham-e-ayyām kī paimāñ-shikanī yaad aa.ī

jaam uThāte hī dil umDā to bhar aa.iiñ āñkheñ
chashm-e-sāqī tirī sāġhar-shiknī yaad aa.ī

yaad aa.ī na kabhī be-sar-o-sāmānī meñ
dekh kar ghar ko ġharīb-ul-vatanī yaad aa.ī

aaj dikhlāte gul-afshānī-e-guftār 'vahīd'
lag ga.ī chup jo vo ġhuncha-dahnī yaad aa.ī

shauq kā rañg bujh gayā yaad ke zaḳhm bhar ga.e
kyā mirī fasl ho chukī kyā mire din guzar ga.e

zishtī-e-pindār dilātā hai yaad
qissa-e-askandar-o-dārā mujhe

baḌī muddatoñ ke ba.ad jo ab tirī yaad aa.ī to yuuñ lagā
sar-e-dasht-e-vahshat zindagī koī mehrbāñ mire saath hai

kisī kī yaad ke saa.e ko ham-safar samjhā
lagā sako to lagā lo junūñ kā andāza

kabhī vo yaad bhī aa.e to malāmat karnā
kabhī us shoḳh kī tasvīr banā.e rakhnā

vo rañj-e-rāh-e-tamannā meñ yād-e-yār-e-azīz
vo duur bajte hue se rabāb-e-anjumanī