Tags-Yaad

tujh ko bhī jab apnī qasmeñ apne va.ade yaad nahīñ
ham bhī apne ḳhvāb tirī āñkhoñ meñ rakh kar bhuul ga.e

mere dushman na mujh ko bhuul sake
varna rakhtā hai kaun kis ko yaad

ai sadaf sun tujhe phir yaad dilā detā huuñ
maiñ ne ik chiiz tujhe dī thī guhar karne ko

yaad jab mujh ko tire saare karam haiñ jānāñ
phir ye ehsān jatāne kī zarūrat kyā hai

tumheñ to yaad kahāñ hoñge ab magar vo din
na dekh kar tumheñ har lamha dekhte the ham

vo jo kahte rahe us kī gavāhī mil rahī hai
ye saarī guftugū un raftagāñ kī yaad meñ hai

rañg pakkā ho chalā thā yaad aatā hai magar
dhuup mere jism par tab Thiik se bhīgī na thī

thak gayā maiñ karte karte yaad tujh ko
ab tujhe maiñ yaad aanā chāhtā huuñ

hai yaad ahl-e-vatan yuuñ ki reg-e-sāhil par
girī huī koī machhlī ho jaal se bāhar

haañ yahī naam thā kuchh aisā hī chehrā-mohrā
yaad paḌtā hai ki aayā thā musāfir koī

hichkiyāñ aatī haiñ par lete nahīñ vo merā naam
dekhnā un kī farāmoshī ko merī yaad ko

rashk se naam nahīñ lete ki sun le na koī
dil hī dil meñ use ham yaad kiyā karte haiñ

bhuul jā.ūñ to maiñ taḌaptī huuñ
yaad rakhne meñ hī suhūlat hai

vo jo phuul the tirī yaad ke tah-e-dast-e-ḳhār chale ga.e
tire shahr meñ bhī sukūn hai tire be-qarār chale ga.e

na vo yaad hai na vo hijr hai na nigāh-e-nāz kā zikr hai
mire zehn se tirī fikr ke sabhī rozgār chale ga.e

hai ye sach ki mausam-e-hijr meñ mirā ḳhaar ḳhaar badan huā
kabhī yaad tujh ko jo kar liyā to badan ke ḳhaar chale ga.e

ab jī meñ hai ki un ko bhulā kar hī dekh leñ
vo baar baar yaad jo aa.eñ to kyā kareñ

yaad kyā dast-e-hunar hai ki sañvartā gayā maiñ
us ko sochā to use yaad hī kartā gayā maiñ

mujhe to yaad hī aatā nahīñ hai
koī lamha ki jab taḌpā nahīñ thā

yaad aa.e us ghaḌī apne gharoñ ke rāste
be-tahāsha thak ga.e jab log mela dekh kar