Tags-Yaad

usī ko yaad dilātā hai baar baar dimāġh
vo ek baat jo dil meñ anī sī lagtī hai

aa.e kyā kyā yaad nazar jab paḌtī in dālānoñ par
us kā kāġhaz chipkā denā ghar ke raushan-dānoñ par

aaj zarā fursat paa.ī thī aaj use phir yaad kiyā
band galī ke āḳhirī ghar ko khol ke phir ābād kiyā

na tamannā na tirī yaad na ġham ho na ḳhushī
kabhī aisā bhī atā ālam-e-tanhā.ī kar

jab tumheñ yaad kiyā rañj huā bhuul ga.e
ham añdheroñ meñ ujāle kī fazā bhuul ga.e

tum se bichhḌe the to jiine kā chalan yaad na thā
tum ko dekhā hai to marne kī duā bhuul ga.e

ham ḳhayāloñ meñ tumheñ yaad kiye jaate haiñ
aur tum dil ke dhaḌakne kī sadā bhuul ga.e

ab tujhe yaad kaun kartā hai
ḳhud ko barbād kaun kartā hai

ab rah-rav-e-māñda se kuchh na kaho haañ shaad raho ābād raho
baḌī der se yaad kiyā tum ne baḌī dard se dī hai sadā tum ne

mujhe ai ahl-e-ka.aba yaad kyā mai-ḳhāna aatā hai
udhar dīvāna jaatā hai idhar mastāna aatā hai

us ko bhī yaad karne kī fursat na thī mujhe
masrūf thā maiñ kuchh bhī na karne ke bāvajūd

dīvār-o-dar sā chāhiye dīvār-o-dar mujhe
dīvāngī meñ yaad nahīñ apnā ghar mujhe

yaad use bhī ek adhūrā afsāna to hogā
kal raste meñ us ne ham ko pahchānā to hogā

tumhārī yaad ko dil meñ basā kar
maiñ sab kuchh bhuul jaanā chāhtā huuñ

āḳhirī baar maiñ kab us se milā yaad nahīñ
bas yahī yaad hai ik shaam bahut bhārī thī

is rāste meñ jab koī saaya na pā.egā
ye āḳhirī daraḳht bahut yaad aa.egā

jab muqaddar hai shab-o-roz kī be-kaifī 'sabā'
ḳhvāb kī tarah har ik yaad bhulā dī jaa.e

shaam paḌte hī kisī shaḳhs kī yaad
kūcha-e-jāñ meñ sadā kartī hai

yaad rahte haiñ ab jo kaam hameñ
ye use bhūlne se nikle haiñ

jinheñ yaad the fasāne bahut apne bāzuoñ ke
ai 'alīm' muzmahil se vo dam-e-nabard kyuuñ haiñ