Tags-Yaad

'farhat' tire naġhmoñ kī vo shohrat hai jahāñ meñ
vallāh tirā rañg-e-suḳhan yaad rahegā

bas ye hī soch ke har vaqt tujhe yaad kiyā
apnī yādoñ ke ta.āqub meñ kabhī to aa.e

yaad aatā hai mujhe ret kā ghar bārish meñ
meñ akelī thī sar-e-rāhguzar bārish meñ

qatra-e-āb ko muhtāj kiyā gardūñ ne
yād-e-ayyām ki thiiñ chashma-e-jārī āñkheñ

ba.ad tark-e-ta.alluqāt 'sabā'
aur bhī us kī yaad aa.egī

aatī hai yaad sub.h-e-masarrat kī baar baar
ḳhurshīd aate aate use kal uThā to lā

vo chahchahe na vo tirī āhañg andalīb
kis gul kī yaad meñ hai tū dil-e-tañg andalīb

jaltī huī sham.oñ ne aksar ehsās kī raakh ko bhaḌkāyā
qurbat meñ damakte chehroñ kī tanhā.ī ke dukh yaad aa.e haiñ

kabhī bolnā vo ḳhafā ḳhafā kabhī baiThnā vo judā judā
vo zamāna naaz o niyāz kā tumheñ yaad ho ki na yaad ho

lamhāt-e-vasl yaad jo aa.e shab-e-firāq
yak-laḳht surḳh ho ga.e aariz be-iḳhtiyār

māyūs tamannāoñ ko ai dost tirī yaad
jaise ufq-e-bīm pe ik aḳhtar-e-ummīd

yaad kī kirneñ pariyāñ ban kar
apnī bāhoñ meñ lipTā kar

'mus.hafī' saañg se kyā ukhḌe hai pashm us kī bhalā
sau tarah se ho jise yaad zabāñ kā bahrūp

zaḳhm jo tū ne diye the haiñ abhī tak taaza
jab chalī sard havā maiñ ne tujhe yaad kiyā

dil thā kisī kī yaad meñ masrūf aur ham
shīshe meñ zindagī ko utāre chale ga.e

yaad bhī haiñ ai 'munīr' us shaam kī tanhā.iyāñ
ek maidāñ ik daraḳht aur tū ḳhudā ke sāmne

ka.aba-e-dil ko agar Dhā.iyegā
yaad rakhiye ki sazā pā.iyegā

yaad meñ merī jo ghabrā.iyegā
merī turbat pe chale ā.iyegā

yaad dilvā ke vo aglī bāteñ
bharī mahfil meñ na rulvā.iyegā

maiñ kahāñ aap kahāñ diid kī ummīd kahāñ
yaad aa.uuñ jo kabhī dekhiye tasvīr mirī