Tags-Yaad

vo yaad hai mirī bātoñ kī tū ki ab bhī tujhe
maiñ dekh luuñ to bahut ḳhud ko yaad aatā huuñ

bahut ro.e haiñ maañ beTe kisī ko yaad kar ke
bahal jā.egā beTe ko ġhubāra mil gayā hai

tirī yaad aa.e to chup rahūñ zarā chup rahūñ to ġhazal kahūñ
ye ajiib aag kī bel thī mire tan-badan se lipaT ga.ī

jahāñ ko chhoḌ diyā thā jahāñ ne yaad kiyā
bichhaḌ ga.e to bahut kārvāñ ne yaad kiyā

milā nahīñ use shāyad koī sitam ke liye
zah-e-nasīb mujhe āsmāñ ne yaad kiyā

vo ek dal jo kaḌī dhuup meñ jhulastā thā
use bhī sāya-e-zulf-e-butāñ ne yaad kiyā

panāh mil na sakī un ko tere dāman meñ
vo ashk jin ko mah-o-kahkashāñ ne yaad kiyā

ḳhayāl ham ko bhī kuchh āshiyāñ kā thā lekin
qafas meñ ham ko bahut āshiyāñ ne yaad kiyā

hamāre ba.ad bahā.e kisī ne kab aañsū
ham ahl-e-dard ko abr-e-ravāñ ne yaad kiyā

ġham-e-zamāna se fursat nahīñ magar phir bhī
'majīd' chal tujhe pīr-e-muġhāñ ne yaad kiyā

aaj kuchh rañg digar hai mire ghar kā 'ḳhālid'
sochtā huuñ ye tirī yaad hai yā ḳhud tū hai

tumhārī yaad ke dariyā tamām suukh chale
jahāñ-tahāñ mujhe sahrā dikhā.ī detā hai

bas itnā yaad hai ik bhuul sī huī thī kahīñ
ab is se baḌh ke dukhoñ kā hisāb kyā rakhnā

yaad meñ terī do-ālam ko bhulānā hai hameñ
umr bhar ab kahīñ aanā hai na jaanā hai hameñ

sūrat-e-bād-e-sabā qāfila-e-yād aayā
zaḳhm-dar-zaḳhm khile phuul se mere dil meñ

dhyān kī sham.a kī lau tez bhī kar dete haiñ
aksar auqāt tirī yaad ke phere dil meñ

saare lamhe yaad aate jo guzāre tere saath
jañgaloñ meñ aag ko jab ham dahaktā dekhte

ye kis kā zahr-e-judā.ī lahū meñ tairtā hai
hameñ to kuchh bhī nahīñ yaad kab judā hue ham

maiñ rahā umr bhar judā ḳhud se
yaad maiñ ḳhud ko umr bhar aayā

yaad hai us but-e-kāfir kā ḳhafā ho jaanā
aur mirā bhuul ke mā.il-ba-duā ho jaanā