Tags-Yaad

kisī ko yaad ham aate nahīñ is anjuman meñ ab
ba-hamdillāh zikr-e-ḳhair rahtā thā jahāñ apnā

vahm sābit hue sab ḳhvāb suhāne tere
yaad karte haiñ magar log fasāne tere

kuchh is tarah se tirī yaad kī mahak aa.ī
ki jaise dāman-e-sahrā meñ koī phuul khilā

purāne āshnā chehroñ ko yaad kar kar ke
hujūm-e-ġham meñ bhī dil ko sambhālte rahiye

yaad kī galiyoñ meñ siina piiT kar
rāt-din tum ko pukārā jā.egā

yaad chandan-vanoñ se guzartī rahī
man meñ sandal mahaktā rahā aaj phir

taa.ir bhī yahāñ paidā haiñ kiye qudrat ne ajab gul-rañg-o-hāsīñ
gar zamzame un kī raushnī sun leñ yaad aa.e unhīñ firdaus-e-barīñ

vo shab bhī yaad hai ki maiñ pahuñchā thā bazm meñ
aur tum uThe the raunaq-e-mahfil liye hue

naza.a meñ hichkī nahīñ aa.ī mujhe
bhūlne vaale ḳhudā-rā yaad kar

ab kahāñ 'ehsān' duniyā meñ vafā
tauba kar nādāñ ḳhudā ko yaad kar

tumhārī yaad meñ duniyā ko huuñ bhulā.e hue
tumhāre dard ko siine se huuñ lagā.e hue

saarī duniyā ke ḳhayālāt the dil meñ lekin
jab se hai yaad tirī kuchh bhī nahīñ yaad mujhe

jo sāmne thā us ke ḳhad-o-ḳhāl nahīñ yaad
vo yaad rahā jis ko zarā dekh liyā hai

mujhe ab dekh kar abr-e-shafaq-ālūda yaad aayā
ki furqat meñ tirī ātish barastī thī gulistāñ par

kahāñ aa ke rukne the rāste kahāñ moḌ thā use bhuul jā
vo jo mil gayā use yaad rakh jo nahīñ milā use bhuul jā

jise paḌhte to yaad aatā thā terā phuul sā chehra
hamārī sab kitāboñ meñ ik aisā baab rahtā thā

āñkhoñ se tujh ko yaad maiñ kartā huuñ roz-o-shab
be-dīd mujh se kis liye begāna ho gayā

yaad meñ terī jahāñ ko bhūltā jaatā huuñ maiñ
bhūlne vaale kabhī tujh ko bhī yaad aatā huuñ maiñ

kuchh ḳhayāl-e-dil-e-nāshād to kar lenā thā
vo nahīñ thā to use yaad to kar lenā thā

kal shaam yaad aayā mujhe!
aise ki jaise ḳhvāb thā