Tags-Yaad

jo log chāheñ to phir tumheñ yaad bhī na aa.eñ
kabhī kabhī tum mujhe bhī un meñ shumār karnā

tamām va.ade kahāñ talak yaad rakh sakoge
jo bhuul jaa.eñ vo ahd bhī ustuvār karnā

kis vaqt yaad aa.ī hai daur-e-nashāt kī
māhaul bhī udaas tabī.at bhī muzmahil

kuchh aañsū ro lene ke baad nazar-e-ḳhvāb ho gayā
maiñ tum ko yaad karte karte gahrī niind so gayā

rageñ lakīreñ ho ga.iiñ masām nuqte ban ga.e
badan tumhārī yaad meñ hurūf-e-nazm ho gayā

dekh kar us ko lagā jaise kahīñ ho dekhā
yaad bilkul nahīñ aayā mujhe ghanToñ sochā

ahl-e-vafā se tark-e-ta.alluq kar lo par ik baat kaheñ
kal tum in ko yaad karoge kal tum inheñ pukāroge

phir sahrā se Dar lagtā hai phir shahroñ kī yaad aa.ī
phir shāyad aane vaale haiñ zanjīreñ pahnāne log

jab tak ki sabaq milāp kā yaad rahā
bastī meñ har ek shaḳhs dil-shād rahā

maiñ apne dil ke añdheroñ ko yaad rakhtā huuñ
tire badan kī tab-o-tāb se guzarte hue

vo jis ne raat dar-e-dil pe aa ke dastak dī
zarūr jhoñkā kisī yād-e-raftagāñ kā thā

kabhī nekī bhī us ke jī meñ gar aa jaa.e hai mujh se
jafā.eñ kar ke apnī yaad sharmā jaa.e hai mujh se

rahegā mashġhala-e-yād-e-raftgāñ kab tak
guzar rahā hai jo us kārvāñ kī baat karo

tere kūche meñ jā ke bhuul ga.e
ḳhud ko ham yaad aa ke bhuul ga.e

yād-e-habīb mujh ko bhī ab mujh se kar judā
mujh ko hujūm-e-dard meñ merī ikaa.ī de

ḳhanjar thā kis ke haath meñ bas itnā yaad kar
zaḳhmoñ kā dard vaqt ke marham pe chhoḌ de

ham haiñ aur ab yaad kā aaseb hai
us ne va.ade to ka.ī iifā kiye

haram se nikle talāsh-e-but meñ butoñ se yād-e-ḳhudā pe bigḌī
ġharaz ham āvāra-e-vafā haiñ kahīñ hamārā guzar nahīñ hai

na samjhā 'dard' ham ne bhed yaañ kī shādī o ġham kā
sahar ḳhandāñ hai kyuuñ rotī hai kis ko yaad kar shabnam

dil kī rut aisī to yād-e-yār ne badlī na thī
ye chaman ujḌā hī is Dhab se ki sahrā ban gayā