Tags-Yaad

tujh se bichhḌe to zamāna huā lekin ab tak
yaad aatā hai ki kuchh bhuul gayā huuñ tujh meñ

ye patthar jo maarā tirī yaad ne
badal dī kahānī ḳhayālāt kī

kyā mujh ko zarūrat ai 'anvar' kyuuñ un ke sitam kā shākī huuñ
jab yaad jafā.eñ aatī haiñ vo ḳhud hī pashemāñ hote haiñ

ye kis kā zikr hai ai 'tāj' lab pe shām-o-sahar
ye kis ki yaad meñ aañsū bahā.e jaate haiñ

qismat kā thā mazāq ki ik husn-e-ittifāq
aa.ī hamārī yaad jab ham ḳhaak ho ga.e

nahīñ hai jis kā hal ab to koī 'nadīm' bas ik sivā tumhāre
maiñ ek aisā hī mas.ala huuñ mujhe duāoñ meñ yaad rakhnā

ham samajhte haiñ janāb-e-shaiḳh kyā karte rahe
hūr-o-ġhilmāñ ke liye yād-e-ḳhudā karte rahe

sach agar pūchho to ham kāfir bhī haiñ momin bhī haiñ
but-kada meñ baiTh kar yād-e-ḳhudā karte rahe

ai munkirīn-e-ulfat maiñ us kī yaad meñ huuñ
ek ek aate jaao īmān laate jaao

ham pe ho jaa.eñ na kuchh aur bhī rāteñ bhārī
yaad aksar vo hameñ ab sar-e-shām aate haiñ

yaad aatā rahā kūcha-e-raftagāñ sar pe sāya-fagan hijr kā āsmāñ
nā-rasā.ī ke sadme nikharte rahe dil jalāte rahe aur ham so ga.e

dil jo sahrā ke sarāboñ se mirā uub gayā
yaad aa.ī mujhe bhūle hue ghar kī sūrat

ḳhudā kī yaad meñ mahviyat-e-dil bādshāhī hai
magar āsāñ nahīñ hai saarī duniyā ko bhulā denā

aise ab ke yaad aa.ī is mah-e-do-hafta kī
chāñdnī utar aa.ī jaise ghar ke āñgan meñ

karb sā karb hai be-daur-o-zamāna honā
us kā ik pal huuñ to kaash ab use yaad aa jā.ūñ

abhī bichhḌā hai vo kuchh roz to yaad aa.egā
naqsh raushan hai magar naqsh hai dhuñdlā.egā

mujhe tagore kā guzrā zamāna yaad aatā hai
Tapak paḌte haiñ aañsū vo fasāna yaad aatā hai

terī yaad kā har manzar pas-manzar likhtā rahtā huuñ
dil ko varaq banātā huuñ aur shab bhar likhtā rahtā huuñ

is qadar yaad kar rahe ho tum
ya.anī jāoge tum bhī bhuul hameñ

thī sarāpā qayāmat mire sāmne
yaad hai yaad hai vo ghaḌī