Tags-Yaad

mire qarīb jo koī gul-e-badan mahkā
to aa.ī yaad koī ḳhush-gavār guzrī bahār

zā.iqe talḳh hue aañkh se vahshat Tapkī
kaun yaad aayā 'jamāl' aaj adū kī sūrat

hashr meñ husn se 'ravish' shikva-e-rū-ba-rū ġhalat
roz-e-azal kī baat hai aaj hī yaad aa.e kyuuñ

lāla-zāroñ kohsāroñ meñ tumheñ DhūñDeñge ham
yaad ke be-nām se kuchh silsile rah jā.eñge

mumkin hai tirī yaad sulagtī rahe tā-umr
ye sho.ala sharar-bār magar yuuñ na rahegā

us ko kholūñ to rag-e-dil ko koī Dastā hai
yaad kī gaThrī meñ ik saañp chhupā hai shāyad

aayā mizha pe laḳht-e-dil-e-be-qarār yaad
gardish jo ham ne siiḳh pe dekhī kabāb kī

haiñ yād-hā-e-rafta ke dīvār-o-dar kahāñ
vo sañg-e-āstāñ kahāñ vo rahguzar kahāñ

yaad itnā hai mire lab pe fuġhāñ aa.ī thī
phir ḳhudā jaane kahāñ dil kī ye āvāz ga.ī

ai yād-e-yār abr kī sūrat kabhī baras
dariyā-e-dil ko dard kā sailāb chāhiye

jāntā huuñ ab yūñhī barbād rakkhegā mujhe
vo bhī lekin is bahāne yaad rakkhegā mujhe

yaad hai ham ko junūn-e-lā-fanā kī laġhzisheñ
ham meñ thī maujeñ kabhī ab dasht-e-vīrāñ ho ga.e

yād-e-faroġh-e-dast-e-hinā.ī na pūchhiye
har zaḳhm-e-dil ko rashk-e-namak-dāñ banā diyā

dam-ba-dam uThtī haiñ kis yaad kī lahreñ dil meñ
dard rah rah ke ye karvaT sī badaltā kyā hai

jab bhī tumhārī yaad kī aahaT mujhe milī
tanhā.ī kāñptī huī mujh se judā huī

ham ne kaaTe peḌ to sāyoñ kī yaad aane lagī
lekin ab harf-e-nadāmat se bhī kuchh hāsil na thā

bhūltā hī nahīñ kahnā ye kisī kāfir kā
tujhe bhūle se kabhī yād-e-ḳhudā bhī aa.ī

aa gayā shukr-e-zabāñ par jo kiyā ḳhum ḳhālī
peT apnā jo bharā yād-e-ḳhudā bhī aa.ī

ruḳhsat ke ba.ad tere sarāpe se māvarā
ye kaun sī adā hai jo ab yaad aa.ī hai

green card us se le rahe ho magar natīja bhī yaad rakhnā
yahāñ kī kaalī tumhāre chehre ko laal kar de to kyā karoge