Tags-Yaad

har koī nāvak o tarkash kī dukāñ pūchhtā hai
kisī gāhak ko magar apnā badan yaad nahīñ

vaqt kis dasht-e-farāmoshī meñ le aayā hai
ab tirā naam bhī ḳhākam-ba-dahan yaad nahīñ

ye bhī kyā kam hai ġharīb-ul-vatanī meñ ki 'farāz'
ham ko be-mehrī-e-arbāb-e-vatan yaad nahīñ

maazī kī chaukhaT pe dastak dil kī hai
yaad us kī ik adā-e-pā lage

hai dil-e-nākām-e-āshiq meñ tumhārī yaad bhī
ye bhī kyā ghar hai ki hai barbād bhī ābād bhī

dil ke miTne kā mujhe kuchh aur aisā ġham nahīñ
haañ magar itnā ki hai is meñ tumhārī yaad bhī

kuchh to 'asġhar' mujh meñ hai qaa.im hai jis se zindagī
jaan bhī kahte haiñ us ko aur un kī yaad bhī

vo misāl-e-ḳhvāb-e-rañgīñ ab kahāñ maujūd hai
so rahī huuñ maiñ abhī tak ḳhvāb-gāh-e-yād meñ

rūdād-e-mohabbat na rahī is ke sivā yaad
ik ajnabī aayā thā uḌā le gayā dil ko

ho gayā huuñ maiñ to un kā 'mus.hafī' halqa-ba-gosh
yaad se merī kab un kānoñ ke baale jaate haiñ

butoñ ke saath lī dī sī jo yād-allāh baaqī hai
to kyā shaiḳh-e-haram tere liye maiñ chhoḌ duuñ vo bhī

dharā kyā hai jo ham se yād-e-māzī le ke jā.egī
jab aa jaatī hai to do ghūñT pī letī hai ḳhuuñ vo bhī

to kyuuñ satātī hai bigḌe dinoñ kī yaad ki ham
musālahat huī duniyā se ab sudhar ga.e haiñ

kuchh is liye bhī to behāl ho ga.e ham log
tumhārī yaad kā behad ḳhayāl rakhte haiñ

ek jhoñkā tire pahlū kā mahaktī huī yaad
ek lamha tirī dildārī kā kyā kyā na banā

mujhe pyaar se tirā dekhnā mujhe chhup chhupā ke vo dekhnā
mirā soyā jazba ubhārnā tumheñ yaad ho ki na yaad ho

rah-o-rasm qalb o nigāh ke vo tumhāre daave nibāh ke
vo hamārā sheḳhī baghārnā tumheñ yaad ho ki na yaad ho

vo hamārī chheḌ vo shoḳhiyāñ vo hamārā kāTnā chuTkiyāñ
vo tumhārā kuhnī kā mārnā tumheñ yaad ho ki na yaad ho

kabhī sard aahoñ ke silsile kabhī ThanDī sāñsoñ ke mashġhale
vo hamārī naqleñ utārnā tumheñ yaad ho ki na yaad ho