Tags-Yaad

der se aa rahī hai yaad tirī
kyā tujhe yaad aa rahā huuñ maiñ

us ko bhulāne lag ga.e is meñ zamāne lag ga.e
ba.ad meñ yaad aa gayā vo koī aur thā to phir

ab use ḳhvāb jaan ke so raho lambī taan ke
yaad na aa sakā to kyā yaad bhī aa gayā to phir

'joshish' likhā maiñ us ko safīne par is tarah
goyā ki bhūlī thī ye ġhazal yaad paḌ ga.ī

us ke kūche meñ miyāñ ḳhaak uḌāte kyuuñ ho
tum se majnūñ to use yaad nahīñ hone ke

us gauhar-e-yaktā kī jo maiñ yaad meñ royā
har ashk-e-musalsal mirā motī kī laḌī thī

aaj tak yaad hai vo shām-e-judā.ī kā samāñ
terī āvāz kī larzish tire lahje kī thakan

nā-umīdī bhī mudāvā be-qarārī kā nahīñ
mashġhala dil kā hai tum ko yaad farmānā hanūz

tujh se ḳhushī ġhamī kā tafarqe miTā ki tū
ik ḳhush-gavār yaad bhī hai sāneha bhī hai

yaad hai teġh-e-be-ruḳhī yaad hai nāvak-e-sitam
bazm se terī ahl-e-dil ranj uThā ke aa.e haiñ

kal koī jhoñkā havā kā chhū gayā
aur phir tū yaad aayā der tak

na vo sohbat-e-māzī na us kī yaad ai 'arsh'
jo kārvāñ hī nahīñ hai to phir ġhubār kahāñ

mah ne aa sāmne shab yaad dilāyā thā use
phir vo tā sub.h mire jī se bhulāyā na gayā

yaad aatī na ham ko jānāñ kī
jaam ġham kā bharā nahīñ hotā

yaad aa.ī na kabhī be-sar-o-sāmānī meñ
dekh kar ghar ko ġharīb-ul-vatanī yaad aa.ī

tujhe bhuul jaane kī koshisheñ kabhī kāmyāb na ho sakīñ
tirī yaad shāḳh-e-gulāb hai jo havā chalī to lachak ga.ī

ham bhī shā.ir the kabhī jān-e-suḳhan yaad nahīñ
tujh ko bhūle haiñ to dil-dārī-e-fan yaad nahīñ

dil se kal mahv-e-takallum the to ma.alūm huā
koī kākul koī lab koī dahan yaad nahīñ

aql ke shahr meñ aayā hai to yuuñ gum hai junūñ
lab-e-goyā ko bhī be-sāḳhta-pan yaad nahīñ

avval avval to na the vāqif-e-ādāb-e-qafas
aur ab rasm-o-rah-e-ahl-e-chaman yaad nahīñ