Tags-Yaad

lipaTtī hai bahut yād-e-vatan jab dāman-e-dil se
palaT kar ik salām-e-shauq kar letā huuñ manzil se

tumhārī yaad ko allāh rakkhe
jab aatī hai to phir jaatī nahīñ hai

kisī kī mahram-e-āb-e-ravāñ kī yaad aa.ī
habāb ke jo barābar kabhī habāb aayā

vo ja.ad-e-mushkīñ jo din ko dekhe to yaad us kī meñ shaam hī se
ye pech-o-tāb aa ke dil se uljhe ki phir sahar tak na suljhe shab se

rañg-e-dil rañg-e-nazar yaad aayā
tere jalvoñ kā asar yaad aayā

vo nazar ban ga.ī paiġhām-e-hayāt
halqa-e-shām-o-sahar yaad aayā

ye zamāna ye dil-e-dīvāna
rishta-e-sañg-o-guhar yaad aayā

ye nayā shahr ye raushan rāheñ
apnā andāz-e-safar yaad aayā

raah kā ruup banī dhuup apnī
koī saaya na shajar yaad aayā

kab na us shahr meñ patthar barse
kab na us shahr meñ sar yaad aayā

ghar meñ thā dasht-navardī kā ḳhayāl
dasht meñ aa.e to ghar yaad aayā

gard uḌtī hai sar-e-rāh-e-ḳhayāl
dil-e-nādāñ kā safar yaad aayā

ek hañstī huī badlī dekhī
ek jaltā huā ghar yaad aayā

is tarah shaam ke saa.e phaile
raat kā pichhlā pahar yaad aayā

phir chale ghar se tamāshā ban kar
phir tirā rauzan-e-dar yaad aayā

kisī patthar kī haqīqat hī kyā
dil kā ā.īna magar yaad aayā

aañch dāmān-e-sabā se aa.ī
e.atibār-e-gul-e-tar yaad aayā

dil jalā dhuup meñ aisā ab ke
paañv yaad aa.e na sar yaad aayā

gar paḌe haath se kāġhaz 'bāqī'
apnī mehnat kā samar yaad aayā

un kā sandeshā laa.ī yaad
vo nahīñ aa.e aa.ī yaad