Tags-Yaad

shāyad kisī kī yaad kā mausam phir aa gayā
pahlū meñ dil kī tarah dhaḌakne lagī hai shaam

na terī yaad na duniyā kā ġham na apnā ḳhayāl
ajiib sūrat-e-hālāt ho ga.ī pyāre

tujhe bhuul gayā kabhī yaad nahīñ kartā tujh ko
jo baat bahut pahle karnī thī ab kī hai

yaad meñ un kī ka.ī baar bikhar jaatā hai
dil bhī kyā hai ki simaT kar nahīñ qaa.em rahtā

hijr kī raat mirī jaañ pe banī ho jaise
dil meñ ik yaad ki neze kī anī ho jaise

yaad meñ terī do-ālam ko bhulānā hai hameñ
umr bhar ab kahīñ aanā hai na jaanā hai hameñ

har-chand laakh tarah bhulātā huuñ yaad ko
'aḳhtar' pukār uThtā hai dil haa.e lucknow

aur phir yaad kiyā ism paḌhā, phūñk diyā
aur phir koh-e-girāñ bhī ḳhas-o-ḳhāshāk hue

ik yaad kā āñchal jo uḌā tez havā meñ
dene lagī hamdard bulāvā koī aahaT

muñDeroñ se koī mānūs sī āvāz aatī hai
koī to yaad ham ko bhī pas-e-dīvār kartā hai

kaan kī bijlī jo yaad aa.ī tirī
barq ke mānind maiñ taḌpā kiyā

vo kaf-e-pā-e-hinā.ī kar ke yaad
hijr kī shab eḌiyāñ ragḌā kiyā

mire dil kī ḳhud ye majāl thī ki vo shām-e-ġham ko sahar kare
tirī yaad aa ke ghaḌī ghaḌī agar āñsuoñ ko hañsā na de

furqat meñ yaad aa.e jo lutf-e-shab-e-visāl
ik aah bhar ke jānib-e-gardūñ nigāh kī

aaj kī sub.h kitnī halkī hai
yaad paḌtā hai raat ro.e the

be-kasī apnī kā aalam mujhe aa jaa.e hai yaad
ki garebāñ meñ mirā sar yūñhī jhukvātī hai

abbā tum mujh ko yaad aate ho
tum mujhe har ghaḌī rulāte ho

bas yahī fikr khā rahī hai mujhe
aap kī yaad aa rahī hai mujhe

mere dil ko to kisī haal meñ manzūr nahīñ
fikr-e-duniyā meñ tirī yaad bhulā.e rakhnā

jab bhī chaḌhte hue dariyā meñ safīna utrā
yaad aayā tire lahje kā kamāl aise meñ