Tags-Yaad

sahmā sahmā sā aalam
sharmā.ī sharmā.ī yaad

un se nisbat ke bal par
mujh se hī iThlā.ī yaad

āñkhoñ se barsāt huī
bādal ban kar chhā.ī yaad

ubhre nazar karne manzar
biite dinoñ kī aa.ī yaad

ishrat-e-rafta ne jā kar na kiyā yaad hameñ
ishrat-e-rafta ko ham yaad kiyā karte haiñ

hañgāme se vahshat hotī hai tanhā.ī meñ jī ghabrā.e hai
kyā jāniye kyā kuchh hotā hai jab yaad kisī kī aa.e hai

tirā naam le ke jaage tujhe yaad kar ke so.e
yuuñ hī saarī umr kaaTī yuuñ hī kar liyā guzārā

tasvīr ho terī jab dil meñ ġham dil ke qarīb aa.e kaise
maiñ yaad tujhe kar letā huuñ jab koī bhī uljhan huī hai

jañgal parbat nadiyāñ jharne yaad raheñge barsoñ tak
is bastī meñ husn hai jitnā pāband-e-ash.ār huā

hijr raas aatā to kyuuñ karte tujhe yaad miyāñ
dhuup lagtī hai to chhāñv kī taraf dekhte haiñ

kisī ke saath guzāre hue hasīñ lamho
tum aaj yaad to aao ki ham ġhazal kah leñ

kisī kī yaad kī mash.al jalā jalā ke 'asar'
añdherā ġham kā miTāo ki ham ġhazal kah leñ

maiñ us kī yaad se dāman chhuḌā luuñ mujh ko ḳhayāl
tab aayā jab na rahā mere iḳhtiyār meñ kuchh

yaad rakkheñge tumhārī bazm meñ aane ko ham
baiThne ke vāste aġhyār uTh jaane ko ham

be-barse guzar jaate haiñ umDe hue bādal
jaise unheñ merā hī patā yaad nahīñ hai

tumhārā naam aayā aur ham takne lage rasta
tumhārī yaad aa.ī aur khiḌkī khol dī ham ne

suno
ye yaad rakhne kā hunar āsāñ nahīñ hotā

'gauhar' ye zamīñ ham ko bahut yaad karegī
uTh jā.eñge jab ālam-e-bālā kī taraf ham

pau phaTte hī train kī siiTī jab kānoñ meñ gūñjtī hai
sarvat terī yaad mire dil ke ḳhānoñ meñ gūñjtī hai

dasht-e-ġhurbat meñ dil-e-vīrāñ ne
yaad jamunā ko ka.ī baar kiyā