Tags-Yaad

ik baat pe aa kar aaj hameñ iqrār ye us se karnā paḌā
kab yaad nahīñ karte us ko kab us ko bhulā.e rakhte haiñ

gardish-e-mai kā is par na hogā asar mast āñkhoñ kā jaadū jise yaad hai
vo nasīm-e-gulistāñ se bahlegā kyā tere āñchal kī ḳhushbū jise yaad hai

tishnagī kī vo shiddat ko bhūlegā kyā dhuup kī vo tamāzat ko bhūlegā kyā
terī be-faiz āñkheñ jise yaad haiñ terā be-sāya gesū jise yaad hai

koī mumtāz hai aur na shāh-e-jahāñ soz aur saaz hai kuchh alag hī yahāñ
tāj-mahaloñ ke vo ḳhvāb dekhegā kyā sañg-e-marmar kā zaanū jise yaad hai

us ko dukh-dard koī chhalegā nahīñ us kī duniyā kā sūraj Dhalegā nahīñ
tere bachpan kī ḳhushiyāñ jise yaad haiñ tere dāman kā jugnū jise yaad hai

ai 'alīm' āfatoñ ke ye lashkar haiñ kyā ek mahshar nahīñ laakh mahshar haiñ kyā
us ko fitnoñ kī parvāh bilkul nahīñ tirā ik ek ghuñghrū jise yaad hai

kyuuñ yūrish-e-tarab meñ bhī ġham yaad aa ga.e
sochā tire karam ko sitam yaad aa ga.e

ai dost mai-kade meñ ye kaisī havā chalī
sab fitna-hā-e-dair-o-haram yaad aa ga.e

raushan abhī huā thā sar-e-jāda-hayāt
ik kākul-e-siyāh ke ḳham yaad aa ga.e

ab kyā dikhā rahā hai rah-e-māh-o-kahkashāñ
nāseh kisī ke naqsh-e-qadam yaad aa ga.e

ek ek kar ke TuuT chuke haiñ ḳhirad ke but
but-ḳhāna-e-junūñ ke sanam yaad aa ga.e

galī ke moḌ se ghar tak añdherā kyuuñ hai 'nizām'
charāġh yaad kā us ne bujhā diyā hogā

lauT ā.eñge parinde na.ī rut ke saath saath
qisse kahāniyoñ ke vo din yaad ho ga.e

mujhe jab bhī vo galiyāñ aur vo rasta yaad aatā hai
koī dhuñdlā sā manzar hai jo ujlā yaad aatā hai

fazā-e-dil pe taarī hai bahut hī habs kā mausam
tirī qurbat kī ḳhushbū kā vo jhoñkā yaad aatā hai

kahā tum to judā.ī kā vo manzar bhuul baiThe ho
ḳhalā meñ dekh kar mujh se vo bolā yaad aatā hai

ḳhizāñ-rut hai magar mujh ko ḳhayāloñ ke tasalsul meñ
mohabbat ke gulāboñ kā vo sapnā yaad aatā hai

kisī ke dukh bhare lamhe meñ jab koī bilaktā hai
haqīqat meñ use har zaḳhm apnā yaad aatā hai

musalsal ret par chalnā vafā kī riit Thahrī hai
tirī dahlīz tak phailā vo sahrā yaad aatā hai

vo lamha jo guzarte mausamoñ meñ saath Thahrā hai
mujhe ḳhud bhī nahīñ ma.alūm kitnā yaad aatā hai