Tags-Yaad

zindagī bhar na kiyā yaad kisī ne aur ab
pūchhte haiñ vo mere ghar kā patā mere ba.ad

chhalakte jaate haiñ manzar tamām āñkhoñ se
darīcha yaad kā shāyad koī khulā hogā

ik tirī yaad se yādoñ ke ḳhazāne nikle
zikr terā bhī bhī mohabbat ke bahāne nikle

bārhā niiñd se yuuñ chauñk uThā huuñ jaise
mere bistar pe tirī yaad huī hai bedār

yaad karne kā tujhe koī bahāna bhī nahīñ
koī chhallā koī chauḌī hī nishānī hotī

jag biite jab jagmag ye dil us kī jot se thā
ab jo vo sūrat phir yaad aa.ī kaisī lagtī hai

ab tak vo samāñ yaad hai jab hosh-ba-jā thā
har shai meñ mujhe lutf thā har shai meñ mazā thā

kuchh yaad haiñ āġhāz-e-mohabbat kī vo bāteñ
aur bhūlne vaale yahī paimān-e-vafā thā

raat bhar us barq-vash kī yaad meñ
sail-e-ashk āñkhoñ se barsātā rahā

phuul to saare jhaḌ ga.e lekin
terī yaad kā zaḳhm harā hai

tā-chand 'suhail' afsurda-e-ġham kyā yaad nahīñ tārīḳh-e-haram
īmāñ ke jahāñ paḌte haiñ qadam paidā vahīñ zamzam hotā hai

yād-e-ḳhudā hī ka.aba-e-dil meñ basā.iye
ab ek but bhī dushman-e-īmāñ nahīñ rahā

jaane vaale kabhī nahīñ aate
jaane vāloñ kī yaad aatī hai

bichhḌe hue vo yaar vo chhoḌe hue dayār
rah rah ke ham ko yaad jo aa.eñ kisī ko kyā

vo ek yaad jo abhī hai dāġh-e-dil banī huī
phisal na jaa.e zehn se kisī ḳhayāl kī tarah

ik ajab haal hai ki ab us ko
yaad karnā bhī bevafā.ī hai

ab bhī aatī hai tirī yaad pa is karb ke saath
TūTtī niiñd meñ jaise koī sapnā dekhe

saath sāhil pe guzarte hue dekhī thī kabhī
yaad hai ab bhī samundar meñ utartī huī shaam

jī meñ hai yaad ruḳh-o-zulf-e-siyah-fām bahut
ronā aatā hai mujhe har sahar-o-shām bahut

sho.ale lapke jab bhī ham ko barkhā-rut kī yaad aa.ī
āñkheñ barsīñ jab bhī ham ne zikr-e-lab-o-ruḳhsār kiyā