Tags-Yaad

kahānī apnī apnī ahl-e-mahfil jab sunāte haiñ
mujhe bhī yaad ik bhūlā huā afsāna aatā hai

aatī hai baat baat mujhe baar baar yaad
kahtā huuñ dauḌ dauḌ ke qāsid se raah meñ

aise bohtān lagā.e ki ḳhudā yaad aayā
but ne ghabrā ke kahā mujh se ki qur.ān uThā

aatī hai ai 'munavār' hañgām-e-naza.a hichkī
kartā hai yaad shāyad ab yaad karne vaalā

yaad kar ke tujhe mazlūm-e-vatan ro.eñge
banda-e-rasm-e-jafā chain se ab so.eñge

Dhale aañsū ki ye TuuTe sitāre
sukūt shab meñ yaad aa.ī kisī kī

zulf-e-butāñ kī yaad meñ ai 'aish' kyā kahūñ
dil ne mire uThā.e haiñ kyā pech-o-tāb-e-shab

maiñ faqat ek ḳhvāb thā terā
ḳhvāb ko kaun yaad rakhtā hai

tumhāre naam tumhāre nishāñ se be-sarokār
tumhārī yaad ke mausam guzarte jaate haiñ

tujh qaid se dil ho kar āzād bahut royā
lazzat ko asīrī kī kar yaad bahut royā

be-ḳhud-e-shauq huuñ aatā hai ḳhudā yaad mujhe
rāsta bhuul ke baiThā huuñ sanam-ḳhāne kā

chupke chupke raat din aañsū bahānā yaad hai
ham ko ab tak āshiqī kā vo zamānā yaad hai

us shahr meñ kitne chehre the kuchh yaad nahīñ sab bhuul ga.e
ik shaḳhs kitāboñ jaisā thā vo shaḳhs zabānī yaad huā

''kun'' kā afsūn-e-azal phūñkā gayā thā jis ghaḌī
mujh ko ab bhī yaad hai bār-e-digar samjhā thā maiñ

varna koī kab gāliyāñ detā hai kisī ko
ye us kā karam hai ki tujhe yaad rahā maiñ

sard ho saktī nahīñ 'sājid' kabhī siine kī aag
dil jalāne ko milā hai yaad kā īñdhan mujhe

vo yaad aatā hai sirf yāroñ ke pūchhne par
tū yaad aatā hai sirf vaqt-e-azān allāh

bhuul jaanā hai to ai dost bhulā de mujh ko
yaad ab yād-dahānī meñ na rakkhī jaa.e

kabhī ehsān koī kar gayā thā
barābar yaad dilvāyā gayā hai

gar sar-e-maqtal na ho zikr-e-butāñ kā hausla
hujra-e-tārīk meñ yād-e-ḳhudā bhī kam nahīñ