Tags-Yaad

denā vo us kā sāġhar-e-mai yaad hai 'nizām'
muñh pher kar idhar ko udhar ko baḌhā ke haath

maiñ tirī yaad ko siine se lagā.e guzrā
ajnabī shahr kī mashġhūl guzar gāhoñ se

is ġhurbat kī dhuup meñ 'shā.ir' apnoñ kā saaya bhī na thā
jis ġhurbat kī dhuup meñ ham ko yaad aa.e begāne tak

yaad ab us kī aa na sakegī soch ke ye baiThe the ki bas
khul ga.e dil ke saare darīche thā jo havā kā zor bahut

vo agar mujh ko na bhūleñ to bhulā.eñ kis ko
ham agar un ko bhulā.eñ to kise yaad kareñ

kyā shauq thā jo yaad sag-e-yār ne kiyā
har ustuḳhāñ taḌap ke badan se nikal gayā

tujhe yaad hai sitamgar koī aur bhī fasāna
vahī zikr-e-āb-o-dāna vahī fikr-e-tā.erāna

phir merī ḳhabar lene vo sayyād na aayā
shāyad ki mirā haal use yaad na aayā

muñh se parda na uThe sāhab-e-man yaad rahe
phir qayāmat hī ayaañ hai ye suḳhan yaad rahe

chhoḌo itnī na zabāñ ġhuncha-dahan yaad rahe
phir hamāre bhī dahan hai ye suḳhan yaad rahe

kūcha-gardoñ meñ nahīñ ham jo ye kūcha chhoḌeñ
ḳhaak karnā hai hameñ yaañ hai badan yaad rahe

ahd aane kā kiyā hai to girah band meñ de
is se shāyad tujhe ai ahd-shikan yaad rahe

aap ke kūche ko ham kāba-e-maqsūd samajh
bhuul baiThe haiñ sab ārām-e-vatan yaad rahe

harf uTh jaane kā kah baiThe ho ab to lekin
phir na kahiyegā kabhī qibla-e-man yaad rahe

sau chaman ek faqat mukhḌe meñ us ke haiñ 'nazīr'
jab ye sūrat ho to phir kis ko chaman yaad rahe

yaad aatī haiñ hameñ jaan tumhārī bāteñ
haa.e vo pyaar kī āvāz vo pyārī bāteñ

yaad aatā hai tirā kyā ke evaz kā kahnā
haa.e phir kab maiñ sunūñgā vo gañvārī bāteñ

yaad yuuñ hosh gañvā baiThī hai
jism se jaan judā baiThī hai

kabhī ye fikr ki vo yaad kyuuñ kareñge hameñ
kabhī ḳhayāl ki ḳhat kā javāb aa.egā

varna koī kab gāliyāñ detā hai kisī ko
ye us kā karam hai ki tujhe yaad rahā maiñ