Tags-Zindagi

maiñ kab se maut ke is aasre pe jiitā huuñ
ki zindagī mirī marne kī yādgār rahe

unheñ apnā batātā hai unheñ apnā samajhtā hai
fareb-e-zindagī hai ye dil-e-dīvāna-vār ab tak

mujhe kuchh nahīñ gyaan
ye zindagī kyā hai?

maut kī nāgin se ab hargiz vo Dar saktā nahīñ
jis ko saarī umr ḳhud ye zindagī Dastī rahī

zindagī ke is safar meñ saikḌoñ chehre mile
dilkashī un kī alag paikar tirā apnī jagah

raushnī bāñTī yahāñ maiñ ne charāġhoñ ke baġhair
zindagī tū ne bhī dekhā mujhe tāvān ke ba.ad

zindagī aise bhī hālāt banā detī hai
log sāñsoñ kā kafan oḌh ke mar jaate haiñ

jo nahīñ lagtī thī kal tak ab vahī achchhī lagī
dekh kar us ko jo dekhā zindagī achchhī lagī

ye mirī zindagī tumhāre baġhair
kitnī be-rañg-o-muḳhtasar Thahrī

tirī aql gum tujhe kar na de rah-e-zindagī meñ sambhal ke chal
tū gumāñ kī had na talāsh kar ki kahīñ bhī hadd-e-gumāñ nahīñ

zindagī kiyā hai koī samjhā.e to
ḳhvāb hai yā ḳhvāb kī ta.abīr hai

tumhārī mohabbat ko zindagī dene ke liye
maiñ ne to apne saare but toḌ liye

kabhī kabhī mire dil meñ ḳhayāl aatā hai
ki zindagī tirī zulfoñ kī narm chhāñv meñ

ārzūoñ ne ka.ī phuul chune the lekin
zindagī ḳhār-badāmāñ hai ise kyā kahiye

aks ko phuul banāne meñ guzar jaatī hai
zindagī ā.ina-ḳhāne meñ guzar jaatī hai

zindagī bojh batātā thā batāne vaalā
ye to bas ek bahāne meñ guzar jaatī hai

gila nahīñ hai jo us ne mujhe na pahchānā
lahū-luhān mirī zindagī kā chehra thā

bahut se kaam kal karne haiñ mujh ko
magar ai zindagī kal na huā to

terī zindagī sargarm merī zindagī uljhan
raqs meñ bhī hai ḳhvāhish aur sargirāñ bhī hai

ye bahār-o-ḳhizāñ ye ḳhushī aur ġham ye hasīñ nāznīñ dil ke patthar sanam
sab sahāre haiñ bas chaar din ke liye zindagī-bhar kā koī sahārā nahīñ