Tags-Zindagi

fikr ko ḳhvāb ḳhayālāt ko faanī likhnā
zindagī aañkh churā.e to kahānī likhnā

tirī zindagī isī se tirī aabrū isī se
jo rahī ḳhudī to shāhī na rahī to rū-siyāhī

bahut qarīb rahī hai ye zindagī ham se
bahut aziiz sahī e'tibār kuchh bhī nahīñ

ab zindagī kā koī bharosa nahīñ rahā
marne lage haiñ log qazā ke baġhair bhī

bhalī lagegī yahī zindagī agar us meñ
ḳhayāl-o-ḳhvāb kī duniyā ko bhī shumār karo

dil-e-fasurda meñ hotī hai zindagī paidā
'nushūr' jura-e-sahbā bhī zindagānī hai

zindagī ham tire itne to ḳhatā-vār na the
ki jise apnā banā.eñ vahī begāna bane

zindagī karne ke andāz to bhūlo na 'vahīd'
tum ne kyā sīkhā agar ishq salīqa na bane

dahr-e-fānī meñ faqat ahl-e-qanā.at ke sivā
zindagī tujh ko bahar-hāl basar kis ne kiyā

ajab sī shart hai ye zindagī bhī
jo manvā.ī hai kam maanī bahut hai

zindagī se samjhautā aaj ho gayā kaise
roz roz to aise sānehe nahīñ hote

jiit kar bhī phir se haarī zindagī
pūchhiye mat kyuuñ guzārī zindagī

ik mahājan sab ke uupar hai khaḌā
jis ne ham ko dī udhārī zindagī

chunā katthā lag rahā hai aa.e din
paan biiḌī aur supārī zindagī

ik taraf mahmūd sā andāz hai
ik taraf mīnā-kumārī zindagī

ho ga.ī hai is 'hanī' se bor jab
phir to bas 'rāhat' pukārī zindagī

chain kī phir niiñd aa.ī qabr meñ
apne tan se jab utārī zindagī

guzrī hai yuuñ uThā.e hue zindagī kā bojh
jaise maiñ koī pul kā sutūñ thā bashar na thā

dil meñ be-nām sī ḳhushī hai abhī
zindagī mere kaam kī hai abhī

jo kabhī sharāb-e-nashāt hai to hai zahr-e-ġham kabhī jaam meñ
hai ye zindagī koī zindagī abhī jī uThe abhī mar ga.e